टेक्सासच्या एका सिनेट जागेसाठी ५७.३ कोटी डॉलरचा विक्रमी खर्च

अमेरिकेतील मध्यावधी निवडणुकांच्या पार्श्वभूमीवर टेक्सासमधील सिनेटची लढत सर्वाधिक खर्चिक बिगर-राष्ट्राध्यक्षीय निवडणूक ठरली आहे. या निवडणुकीत उमेदवार आणि त्यांच्या समर्थक गटांनी जाहिरातींवर केलेला खर्च हा तब्बल ५७.३ कोटी डॉलर इतका झाला आहे. प्राथमिक आणि सर्वसाधारण निवडणुकीतील हा एकत्रित आकडा आहे.

टेक्सासमध्ये रिपब्लिकन पक्षाचे केन पॅक्स्टन आणि डेमोक्रॅटिक पक्षाचे जेम्स तालारिको यांच्यात लढत होत आहे. जाहिरात विश्लेषण संस्थेच्या आकडेवारीनुसार, प्राथमिक निवडणुकीसाठी १६.५७ कोटी डॉलर, तर सर्वसाधारण निवडणुकीसाठी ४०.७५ कोटी डॉलर खर्च आणि जाहिरातींचे आरक्षण करण्यात आले.

सुरुवातीला डेमोक्रॅटिक पक्षाने जाहिरातींवर अधिक खर्च केला. ऑगस्टच्या मध्यापर्यंत डेमोक्रॅटिक उमेदवार आणि समर्थक गटांनी २.१४ कोटी डॉलर खर्च केले होते. त्यावेळी रिपब्लिकन पक्षाचा खर्च केवळ २५ लाख डॉलर होता. मात्र, २५ ऑगस्टपासून रिपब्लिकन पक्षाने दर आठवड्याला सरासरी १.५३ कोटी डॉलर अधिक खर्च केला. सप्टेंबरच्या १५ तारखेच्या आठवड्यात हा फरक २.९२ कोटी डॉलर होता.

बाहेरील राजकीय गटांचाही प्रचारात मोठा सहभाग आहे. पॅक्स्टन यांच्या समर्थनार्थ अशा गटांनी २५.१७ कोटी डॉलर, तर तालारिको यांच्या समर्थनार्थ ३.०६ कोटी डॉलर खर्च केले. ‘टेक्सास पीएसी’ने एकट्याने १८.२१ कोटी डॉलर खर्च करून पॅक्स्टन यांच्या समर्थनार्थ आणि तालारिको यांच्या विरोधात जाहिराती केल्या. दरम्यान, दूरचित्रवाणीवरील एकूण जाहिरातींपैकी ६१ टक्के जाहिराती नकारात्मक स्वरूपाच्या होत्या. रिपब्लिकन पक्षाच्या जाहिरातींमध्ये हे प्रमाण सुमारे दोन तृतीयांश, तर डेमोक्रॅटिक पक्षाच्या जाहिरातींमध्ये ५२ टक्के होते.

हे ही वाचा:

भारतानंतर आता परदेशातही धावणार ‘वंदे भारत’

सत्ताबदल लोकशाही मार्गानेच हवा!

पंजाबमध्ये ‘आप’ला गळती; आणखी एका आमदाराचा राजीनामा

प्रदर्शनापूर्वीच ‘रामायण’च्या ११ लाखांहून अधिक तिकिटांची विक्री

यापूर्वी २०२४ मधील ओहायो सिनेट निवडणुकीत ५४.२७ कोटी डॉलरचा जाहिरात खर्च झाला होता. टेक्सासने हा विक्रम मोडला आहे. २०२६ च्या निवडणूक चक्रात ५० कोटी डॉलरचा टप्पा ओलांडणारी टेक्सास ही दुसरी बिगर-राष्ट्राध्यक्षीय सिनेट निवडणूक ठरली आहे.