देशभरात एलपीजी गॅस सिलिंडरच्या उपलब्धतेबाबत निर्माण झालेल्या संभ्रमाच्या पार्श्वभूमीवर केंद्र सरकारने मोठी स्पष्टता दिली आहे. एलपीजी रिफिल बुकिंगच्या नियमांमध्ये कोणताही बदल करण्यात आलेला नाही, असे सरकारने ठामपणे सांगितले आहे. गेल्या काही दिवसांत सोशल मीडियावर आणि काही वृत्तांमध्ये एलपीजी बुकिंगसाठी नवीन वेळापत्रक लागू झाल्याच्या बातम्या पसरल्या होत्या. मात्र, सरकारने या सर्व दाव्यांना फेटाळून लावत नागरिकांना दिशाभूल करणाऱ्या माहितीपासून सावध राहण्याचे आवाहन केले आहे.
हे ही वाचा:
भारताच्या AI क्षेत्रात मोठी झेप
वंदे मातरमविरोधातली याचिका सर्वोच्च न्यायालयाने फेटाळली
इराणने पाकिस्तानकडे जाणाऱ्या जहाजाला होर्मुझ ओलांडण्यापासून रोखले
“अमेरिका स्वतःशीच वाटाघाटी करतेय”
सरकारने स्पष्ट केले की सध्या लागू असलेले नियमच पुढेही कायम राहतील. त्यानुसार, शहरी भागात एलपीजी सिलिंडर रिफिल बुकिंगसाठी किमान २५ दिवसांचा अंतर आवश्यक आहे, तर ग्रामीण भागात हे अंतर ४५ दिवसांचे आहे. हे नियम सर्व ग्राहकांसाठी समान आहेत आणि पीएम उज्ज्वला योजनेतील लाभार्थ्यांसाठी वेगळे नियम लागू नाहीत.
दरम्यान, पश्चिम आशियातील तणावपूर्ण परिस्थितीमुळे इंधन पुरवठ्याबाबत काही प्रमाणात चिंता निर्माण झाली होती. मात्र, केंद्र सरकारने देशात एलपीजीचा पुरेसा साठा उपलब्ध असल्याचे आश्वासन दिले आहे. तसेच रिफायनरीज पूर्ण क्षमतेने कार्यरत असून घरगुती गॅस वितरण सुरळीत सुरू असल्याचेही सांगण्यात आले आहे.
सरकारने नागरिकांना ‘पॅनिक बुकिंग’ टाळण्याचे आवाहन केले आहे. कारण अनावश्यक घाईगडबडीत बुकिंग केल्यास वितरण व्यवस्थेवर ताण येऊ शकतो आणि इतर ग्राहकांना अडचणींचा सामना करावा लागू शकतो.
तसेच, काळाबाजार रोखण्यासाठी आणि साठेबाजीवर नियंत्रण ठेवण्यासाठी विविध राज्यांमध्ये तपास मोहिमा सुरू करण्यात आल्या आहेत. सरकार परिस्थितीवर बारकाईने लक्ष ठेवून असून आवश्यक ते सर्व उपाययोजना करण्यात येत असल्याचे स्पष्ट करण्यात आले आहे.
एकूणच, एलपीजी पुरवठा सुरळीत असून बुकिंग नियमांमध्ये कोणताही बदल झालेला नाही. त्यामुळे नागरिकांनी अफवांवर विश्वास न ठेवता अधिकृत माहितीवरच भरोसा ठेवावा, असे सरकारचे स्पष्ट मत आहे.