उत्तर प्रदेश पोलिसांनी शहजाद भट्टी नेटवर्कविरोधात मोठी कारवाई केली आहे. या नेटवर्कशी संबंधित आतापर्यंत ५२ आरोपींना अटक करण्यात आली असून, १२ गुन्हे दाखल करण्यात आले आहेत. आरोपींकडून पिस्तूल, काडतुसे, चाकू, ज्वलनशील द्रव आणि आक्षेपार्ह पोस्टर्स जप्त करण्यात आल्याची माहिती पोलिसांनी दिली.
२६ मे रोजी केंद्रीय तपास यंत्रणांसोबत संयुक्त कारवाई करत सुमारे १७५ संशयितांची चौकशी करण्यात आली होती. तसेच नेटवर्कशी संबंधित सुमारे ६० संशयितांविरोधात प्रतिबंधात्मक कारवाई करण्यात आली. त्यानंतर १२ ऑगस्ट रोजी राज्यस्तरीय संयुक्त मोहीम राबवून सुमारे ६२ जणांची चौकशी करण्यात आली. उत्तर प्रदेश पोलिसांच्या माहितीनुसार, सोशल मीडियाच्या माध्यमातून तरुणांना या नेटवर्कशी जोडून त्यांना कट्टरपंथाकडे ढकलल्याचा आरोप आहे.
जुलै २०२६ मध्ये उत्तर प्रदेश पोलिसांनी शहजाद भट्टी नेटवर्कला दहशतवादी संघटना घोषित करून त्याचा केंद्र सरकारच्या चौथ्या अनुसूचीत समावेश करण्याची शिफारस केली होती. हे नेटवर्क उद्ध्वस्त करण्यासाठी आणि त्यावर प्रभावी नियंत्रण मिळवण्यासाठी कारवाई सातत्याने सुरू असल्याचे पोलिसांनी सांगितले.
हे ही वाचा:
कांदिवलीत बनावट दागिन्यांच्या युनिटवर छापा; १३ बाल कामगारांची सुटका
काँग्रेसचे तुष्टीकरणाचं राजकारण आता चालणार नाही!
चिनाब ब्रिजवर वंदे भारत सुसाट; गाठला १०० किमी प्रतितासाचा वेग!
कॅन्सर mRNA थेरपी ठरली गेमचेंजर! मॉडर्नाच्या शेअर्समध्ये १७७ टक्क्यांची झेप
दरम्यान, केंद्रीय गृहमंत्री अमित शाह यांनी नुकतेच सांगितले होते की, ८०व्या स्वातंत्र्यदिनापूर्वी सुरक्षा यंत्रणांनी शहजाद भट्टी मॉड्यूल पूर्णपणे उद्ध्वस्त केले आहे. देशातील १४ राज्यांमध्ये करण्यात आलेल्या समन्वित कारवाईत या नेटवर्कशी संबंधित २०० हून अधिक सदस्यांना अटक करण्यात आल्याचे त्यांनी म्हटले होते. तपासात सहभागी अधिकाऱ्यांच्या म्हणण्यानुसार, भट्टी मॉड्यूल हे त्यांच्या समोर आलेल्या सर्वात आव्हानात्मक मॉड्यूलपैकी एक होते. भारतीय तरुणांची ज्या पद्धतीने भरती केली जात होती, ती चिंताजनक असल्याचे अधिकाऱ्यांनी सांगितले.