पाकिस्तानातील खैबर पख्तूनख्वा प्रांतात एका गुरुद्वारामध्ये सेवा करणाऱ्या वृद्ध शीख दाम्पत्याची अज्ञात हल्लेखोरांनी गोळ्या झाडून हत्या केल्याची धक्कादायक घटना समोर आली आहे. या घटनेमुळे पाकिस्तानातील धार्मिक अल्पसंख्याकांच्या सुरक्षेबाबत पुन्हा एकदा गंभीर प्रश्न उपस्थित झाले आहेत.
माहितीनुसार, मर्दान शहरातील बाबू मोहल्ला परिसरातील गुरुद्वारात ही घटना घडली. गुरुद्वारात सेवा करणारे जगन्नाथ आणि अस्मा वंती हे वृद्ध दाम्पत्य तेथे उपस्थित असताना अज्ञात हल्लेखोरांनी त्यांच्यावर गोळीबार केला. या हल्ल्यात दोघांचाही जागीच मृत्यू झाला. घटनेनंतर आरोपी फरार झाले असून पोलिसांनी तपास सुरू केला आहे. स्थानिक पोलिसांच्या माहितीनुसार, हल्लेखोरांनी गुरुद्वारात घुसून थेट गोळीबार केला. हल्ल्यामागील नेमके कारण अद्याप स्पष्ट झाले नसले तरी विविध शक्यतांचा तपास सुरू आहे. आरोपींचा शोध घेण्यासाठी विशेष पथके तयार करण्यात आली आहेत.
या घटनेनंतर भारतातही तीव्र प्रतिक्रिया उमटल्या आहेत. भारतीय जनता पक्षाने या हत्याकांडाचा निषेध करत पाकिस्तानातील शीख आणि इतर धार्मिक अल्पसंख्याकांच्या सुरक्षेचा मुद्दा उपस्थित केला आहे. पाकिस्तानमध्ये अल्पसंख्याक समुदायांवर होणारे हल्ले चिंताजनक असल्याचे भाजप नेत्यांनी म्हटले आहे.
हे ही वाचा:
पोस्ट केली, नंतर एडिट केली! अमेरिका-इराण कराराबाबत घोषणेची पाकिस्तानची घाई
ठाकरे गटात भूकंप होणारच! बैठकीला ६ खासदार गैरहजर
तृणमूलचे बंडखोर आमदार ऋतब्रता बॅनर्जींचे विरोधी पक्षनेतेपद कायम!
वायुसेना अधिकाऱ्याच्या पत्नीच्या जबरदस्ती धर्मांतर प्रकरणात मौलवी अटकेत
दरम्यान, शिरोमणी गुरुद्वारा प्रबंधक कमिटी (एसजीपीसी) नेही या घटनेचा तीव्र निषेध नोंदवला आहे. एसजीपीसीचे अध्यक्ष हर्जिंदर सिंह धामी यांनी या हल्ल्याला धार्मिक स्थळाच्या पावित्र्यावर झालेला गंभीर आघात असल्याचे म्हटले आहे. तसेच पाकिस्तान सरकारने तातडीने निष्पक्ष चौकशी करून दोषींना कठोर शिक्षा द्यावी, अशी मागणी त्यांनी केली. एसजीपीसीने म्हटले आहे की, गुरुद्वारात सेवा करणाऱ्या निरपराध व्यक्तींना लक्ष्य करणे हा केवळ गुन्हेगारी प्रकार नसून धार्मिक स्वातंत्र्य आणि अल्पसंख्याकांच्या सुरक्षेवर झालेला हल्ला आहे. या घटनेमुळे पाकिस्तानातील शीख समाजामध्ये भीतीचे वातावरण निर्माण झाले आहे.