पश्चिम बंगाल पोलिसांनी मोठी कारवाई करत तृणमूल काँग्रेसचे माजी आमदार सब्यसाची दत्ता यांची पाच बँक खाती गोठवली आहेत. सब्यसाची दत्ता हे उत्तर २४ परगणा जिल्ह्यातील राजारहाट-न्यूटाउन विधानसभा मतदारसंघातून दोन वेळा आमदार राहिले आहेत. तसेच ते बिधाननगर महानगरपालिकेचे अध्यक्षपदही भूषवले होते. यापूर्वी याच महिन्यात त्यांना भ्रष्टाचार आणि खंडणीवसुलीच्या प्रकरणात अटक करण्यात आली होती. पोलिसांच्या माहितीनुसार, दत्ता यांच्या पत्नी इंदिरा दत्ता यांचा शोध सुरू असून पतीच्या अटकेनंतर त्या फरार झाल्या आहेत. तपास अधिकाऱ्यांकडून त्यांचा ठावठिकाणा शोधण्याचे प्रयत्न सुरू आहेत.
तपासादरम्यान सब्यसाची दत्ता आणि इंदिरा दत्ता यांच्या नावावर एकूण पाच बँक खाती असल्याचे उघड झाले आहे. यापैकी एक खाते संयुक्त स्वरूपाचे आहे. या सर्व खात्यांमध्ये मिळून सुमारे १.७० कोटी रुपये जमा असल्याचे समोर आले आहे. याशिवाय, या दाम्पत्याकडे एक सेल्फ-डिपॉझिट लॉकरही असल्याची माहिती पोलिसांना मिळाली आहे. तपास अधिकाऱ्यांना या लॉकरमध्ये मोठ्या प्रमाणात सोने असण्याची शक्यता वाटत आहे. दत्ता यांच्या अटकेनंतर त्यांच्या निवासस्थानी करण्यात आलेल्या छाप्यात ५० किलो सोन्याच्या खरेदीची पावती जप्त करण्यात आली होती.
पाच बँक खाती गोठवण्याबरोबरच तपास अधिकाऱ्यांनी दत्ता यांची उच्च श्रेणीतील एसयूव्ही कारही जप्त केली आहे. ही कार त्यांच्या पत्नीच्या नावावर नोंदणीकृत होती. तसेच तपासादरम्यान पोलिसांना दत्ता यांच्या नावावर नोंद असलेल्या निवासी फ्लॅटचीही माहिती मिळाली आहे. गेल्या शुक्रवारी उत्तर २४ परगणा जिल्ह्यातील गाईघाटा येथील दत्ता यांच्या सासरच्या घरीही छापेमारी करण्यात आली होती. मात्र, या कारवाईत कोणतीही जप्ती किंवा संशयास्पद वस्तू आढळून आली नाही.
हे ही वाचा:
अफगाणिस्तानला भारताकडून ५ टन अत्यावश्यक औषधांची मदत
बंडखोर खासदारांविषयी बोलताना राऊतांची जीभ घसरली
फ्रान्समध्ये आता भारतीय पर्यटकांना यूपीआयद्वारे थेट पेमेंटची सुविधा
ट्रम्प यांच्या नाराजीकडे दुर्लक्ष; लेबनॉनवरील इस्रायली हल्ले सुरूच
कोलकात्याच्या उपनगरातील सॉल्ट लेक परिसरात राहणाऱ्या एका व्यावसायिकाने केलेल्या तक्रारीनंतर दत्ता यांच्याविरोधात कारवाई सुरू झाली. या प्रकरणाचा तपास बिधाननगर सिटी पोलिसांकडे आहे. तक्रारीनंतर बिधाननगर उत्तर पोलीस ठाण्याच्या पथकाने ८ जूनच्या मध्यरात्री रायगाछी येथील दत्ता यांच्या निवासस्थानी छापा टाकला होता. त्यानंतर ९ जून रोजी दीर्घ चौकशीनंतर त्यांना अटक करण्यात आली. सब्यसाची दत्ता यांच्याविरोधात यापूर्वीही भ्रष्टाचार, खंडणीवसुली आणि गुंडगिरीसंदर्भात अनेक तक्रारी दाखल झाल्या होत्या. दरम्यान, पोलिस आता त्यांना बुधवारी बिधाननगर न्यायालयात हजर करणार असून पुढील कोठडीची मागणी करणार आहेत.