आंध्र प्रदेशातील चित्तूर जिल्ह्यात एक लज्जास्पद घटना उघडकीस आली आहे, जिथे कर्ज फेडले नाही म्हणून एका सावकाराने एका महिलेला झाडाला बांधले आणि तिला क्रूरपणे मारहाण केली आणि शिवीगाळ केली. ही घटना सोमवारी (१६ जून) दुपारी १ वाजता कुप्पम मंडळातील नारायणपुरम गावात घडली. या प्रकरणी लोकांकडून संताप व्यक्त केला जात आहे.
रिपोर्टनुसार, सिरिशाचा पती थिम्मरायप्पा याने तीन वर्षांपूर्वी मुनिकनप्पा यांच्याकडून ८०,००० रुपये उधार घेतले होते. ते पैसे परत करू न शकल्याने, हे जोडपे त्यांच्या मुलांसह कुप्पम मंडळातील नारायणपुरम गाव सोडून निघून गेले होते. तेव्हापासून पिडीत महिला सिरिशा तिच्या कुटुंबाचे पालनपोषण करण्यासाठी आणि कर्ज फेडण्यासाठी रोजंदारीवर काम करत होती.
याच दरम्यान, ही महिला तिच्या मुलाचे परीक्षा प्रमाणपत्र घेण्यासाठी गावात परतली होती, तेव्हा तिला मुनिकनप्पा नावाच्या स्थानिक सावकाराने पाहिले. तिला पाहताच, सावकार मुनिकनप्पाने शिवीगाळ केली, तिला कडुलिंबाच्या झाडावर ओढले, दोरीने बांधले आणि मारहाण केली. कर्ज न फेडल्यास तिला जीवे मारण्याची धमकीही त्याने दिली. जेव्हा प्रत्यक्षदर्शींनी ही घटना रेकॉर्ड करण्याचा प्रयत्न केला तेव्हा त्याने त्यांच्यावरही हल्ला केला.
हे ही वाचा :
एअर इंडियाच्या बोईंग 787 च्या तपासणीत कोणतीही सुरक्षा समस्या नाही
पुणे, चंद्रपूर, नंदुरबार, धाराशीव जिल्ह्यात उबाठा गटाला खिंडार!
देशातील पहिला रेडिओ महोत्सव मुंबईत, मंत्री आशिष शेलार यांची घोषणा
भारतातून इराणला होणारी तांदळाची निर्यात थांबली, सुक्या मेव्याचे दरही वाढले!
यानंतर गावकऱ्यांनी पोलिसांना याची माहिती दिली. घटनेची माहिती मिळताच कुप्पम पोलिसांनी घटनास्थळी पोहोचून सावकार मुनिकनप्पाला अटक केली. मुख्यमंत्री एन. चंद्राबाबू नायडू यांनी या घटनेवर तीव्र नाराजी व्यक्त केली. त्यांनी जिल्हा पोलिस अधीक्षकांशी बोलून आरोपींच्या अटकेची पुष्टी केली आणि कठोर कारवाईचे निर्देश दिले. मुख्यमंत्र्यांनी अधिकाऱ्यांना पीडित महिला आणि तिच्या कुटुंबाला सर्वतोपरी मदत करण्याचे आणि भविष्यात अशा घटना टाळण्यासाठी आवश्यक पावले उचलण्याचे निर्देश दिले.
