जम्मू- काश्मीरमधील पहलगाम हल्ल्याच्या जवळपास आठ महिन्यांनंतर, राष्ट्रीय तपास संस्थेने (एनआयए) जम्मूमधील एका विशेष न्यायालयात आरोपपत्र दाखल केले आहे. एनआयएच्या तपासात असे आढळून आले की, हल्ल्यात थेट सहभागी असलेले तीन दहशतवादी लष्कराच्या ऑपरेशन महादेवमध्ये मारले गेले. या दहशतवाद्यांची ओळख सुलेमान शाह (उर्फ फैसल जट्ट किंवा हाशिम मुसा), हमजा (उर्फ हमजा अफगाणी) आणि जिब्रान (उर्फ जिब्रान भाई) अशी झाली आहे. शिवाय, हल्ल्याच्या एक दिवस आधी दहशतवाद्यांना रसद पुरवणारे, आश्रय देणारे बशीर अहमद जोथर, परवेझ अहमद जोथर आणि मोहम्मद युसूफ कटारी यांचीही आरोपपत्रात नावे आहेत. आरोपपत्रात दहशतवादी संघटना लष्कर-ए-तैयबा (एलईटी) आणि त्याचे प्रॉक्सी, रेझिस्टन्स फ्रंट (टीआरएफ) यांचेही नाव आहे.
एनआयएच्या तपासात असे दिसून आले की बशीर आणि परवेझ हे स्थानिक रहिवासी आहेत. वृत्तानुसार, त्यांनी २१ एप्रिलच्या रात्री हिल पार्क परिसरातील एका ढोक (झोपडी) मध्ये दहशतवाद्यांना आश्रय दिला होता. हल्ल्याच्या जवळजवळ दोन महिन्यांनंतर २२ जून रोजी या भावांना अटक करण्यात आली. वृत्तानुसार, जोथर बंधूंच्या फोनवर काही पाकिस्तानी नंबर आढळले. एनआयएच्या मते, या व्यक्तींवर जुलैमध्ये भारतीय सैन्याने मारलेल्या तीन दहशतवाद्यांना आश्रय दिल्याचा आरोप आहे. अटक केलेल्यांपैकी दोघांनी (परवेझ अहमद जोथर आणि बशीर अहमद जोथर) तिन्ही हल्लेखोरांना बंदी घातलेल्या संघटना लष्कर-ए-तैयबाशी संबंधित पाकिस्तानी नागरिक म्हणून ओळखले.
हे ही वाचा:
‘मनरेगा’ रद्द करून नवीन ग्रामीण रोजगार कायदा आणणार?
तेजस्वी घोसाळकरांचा ठाकरेंना जय महाराष्ट्र; भाजपात प्रवेश!
‘धुरंधर’ने ओलांडला ५०० कोटींचा टप्पा!
पक्ष नेतृत्वावर प्रश्नचिन्ह उपस्थित करणाऱ्या माजी आमदाराची काँग्रेसमधून हकालपट्टी
पहलगाम हल्ल्याला प्रत्युत्तर म्हणून, भारतीय सशस्त्र दलांनी ७ मे रोजी पाकिस्तान आणि पाकव्याप्त काश्मीरमधील दहशतवाद्यांच्या तळांवर अचूक हल्ले केले. “ऑपरेशन सिंदूर”च्या कारवाईत लष्कर-ए-तैयबा आणि जैश-ए-मोहम्मदचे मुख्यालय आणि प्रशिक्षण केंद्रे यासह नऊ ठिकाणांना लक्ष्य केले गेले, जिथून भारताविरुद्ध दहशतवादी हल्ले करण्याची योजना आखली जात होती.
