पश्चिम बंगालच्या उत्तर २४ परगणा जिल्ह्यातील संदेशखली भागात हिंसाचार घडल्याची घटना उघडकीस आली. तृणमूल काँग्रेसच्या कार्यकर्त्यांनी पोलिसांवर हल्ला केल्याची माहिती समोर आली आहे. जमीन हडपल्याचा आरोप असलेल्या तृणमूल काँग्रेसच्या नेत्याला अटक करणाऱ्या पोलिस पथकावर स्थानिक तृणमूल काँग्रेस कार्यकर्त्यांनी हल्ला केला. आरोपी तृणमूल काँग्रेस कार्यकर्ता मुसा मोल्ला यांना अटक करण्यासाठी पोलिस पथक संदेशखली परिसरात पोहोचले तेव्हा पक्षाच्या कार्यकर्त्यांच्या जमावाने त्यांच्यावर हल्ला केला, ज्यामध्ये सहा पोलिस जखमी झाले. हल्ल्यात पोलिसांच्या वाहनाचेही नुकसान झाले.
मुसा मोल्लाला मासेमारीसाठी परिसरातील जमीन बळकावल्याचा आरोप असल्याने त्याला अटक करण्यात आली. परिसरातील इतर लोक, जे तृणमूल काँग्रेसचे सदस्य देखील आहेत, त्यांनी या अतिक्रमणाला आक्षेप घेतला आणि संघर्ष केला. जमावाच्या हल्ल्यानंतरही मोल्लाला अखेर पोलिस ठाण्यात नेण्यात आले. पोलिसांनी सांगितले की, मोल्लावर बेकायदेशीरपणे जमिनीवर कब्जा केल्याचा आरोप आहे आणि तो काही काळापासून दुसऱ्या व्यक्तीसोबत जमिनीच्या वादात गुंतलेला आहे. हे प्रकरण न्यायालयातही पोहोचले होते आणि न्यायालयाने जमिनीवर मनाई आदेश दिला होता.
न्यायालयाच्या स्थगिती आदेशाला न जुमानता, मोल्लाने मासेमारीसाठी भूखंडावर तलाव खोदण्यास सुरुवात केली. याबद्दल त्याच्याविरुद्ध तक्रारी दाखल झाल्यावर, पोलिसांनी मोल्लाला नोटीस बजावली आणि न्यायालयाच्या निर्देशांचे उल्लंघन केल्याबद्दल स्थानिक राजबारी पोलिस चौकीत हजर राहण्यास सांगितले. परंतु, त्याने पोलिसांच्या सूचनाही झुगारून दिल्या आणि आपले बेकायदेशीर कृत्य सुरूच ठेवले. यानंतर, पोलिस त्याला अटक करण्यासाठी त्या भागात पोहोचले.
बसीरहाट जिल्हा पोलिसांच्या एका वरिष्ठ अधिकाऱ्याने सांगितले की, “मुसा मोल्ला न्यायालयाच्या आदेशाचे पालन करत नव्हता. त्यामुळे त्याला पोलिस स्टेशनमध्ये हजर राहण्याचे आदेश देणारी नोटीस पाठविण्यात आली होती. तथापि, त्याने समन्सला प्रतिसाद दिला नाही. त्यानंतर, त्याला अटक करण्यासाठी पोलिसांचे एक पथक हुलोपारा येथे पोहोचले. त्यावेळी मुल्लाने त्याच्या साथीदारांना बोलावून पथकावर हल्ला केला. पोलिसांच्या कामात अडथळा आणणे, हल्ला आणि तोडफोड केल्याबद्दल भारतीय न्याय संहिता (BNS), 2023 च्या संबंधित कलमांखाली ११ जणांविरुद्ध गुन्हे दाखल करण्यात आले आहेत.”
हे ही वाचा:
छत्तीसगडच्या सुकमा, बीजापूरमध्ये १४ नक्षलवादी मारले!
“हातात पदवी, खिशात आरडीएक्स असलेला व्हाईट कॉलर दहशतवाद देशासाठी धोकादायक”
चाकू, हातोडे, हातमोजे आणि… इस्लामी कट्टरतावाद्याचा कट उधळला
“मोदी सरकार हटवण्यासाठी बांगलादेशसारखी निदर्शने आवश्यक”
हिंसाचारात सहभागी असलेले लोक संदेशखली प्रकरणाप्रकरणी सध्या तुरुंगात असलेले तृणमूल काँग्रेसचे नेते शाहजहान शेख यांचे जवळचे असल्याचेही समोर आले आहे. पोलिसांवरील हल्ल्यामुळे संदेशखलीमध्ये भीती आणि तणाव निर्माण झाला आहे. परिस्थिती आणखी बिकट होऊ नये म्हणून, जवळच्या पोलिस ठाण्यांमधून मोठा पोलिस बंदोबस्त तैनात करण्यात आला आहे.
संदेशखली येथे यापूर्वीही अशीच घटना घडली होती. दोन वर्षांपूर्वी, जेव्हा अंमलबजावणी संचालनालयाचे पथक रेशन वाटप घोटाळ्याप्रकरणी शाहजहान शेख यांच्या घरावर छापा टाकण्यासाठी गेले होते, तेव्हा त्यांच्या समर्थकांनी ईडी अधिकाऱ्यांवर हल्ला केला होता. त्या घटनेत अनेक अधिकारी जखमी झाले होते.