जम्मू-काश्मीरमधील कुलगाम जिल्ह्यातील केलम परिसरात दहशतवाद्यांनी बिगर-स्थानिक मजुरांना लक्ष्य करत गोळीबार केला. या हल्ल्यात सुरुवातीला एका मजुराचा जागीच मृत्यू झाला, तर गंभीर जखमी झालेल्या दुसऱ्या मजुराने शनिवारी (१ ऑगस्ट) पहाटे उपचारादरम्यान अखेरचा श्वास घेतला. त्यामुळे या हल्ल्यातील मृतांचा आकडा दोनवर पोहोचला आहे.
माहितीनुसार, दोन्ही मजूर छत्तीसगडमधील रहिवासी असून ते कुलगाममधील एका वीटभट्टीवर काम करत होते. शुक्रवारी सायंकाळी दहशतवाद्यांनी वीटभट्टीवर पोहोचून त्यांच्यावर अचानक गोळीबार केला. हल्ल्यानंतर परिसरात भीतीचे वातावरण निर्माण झाले. मृतांपैकी एका मजुराची ओळख २४ वर्षीय दीपक रात्रे अशी झाली आहे. दुसरा जखमी मजूर रुग्णालयात दाखल करण्यात आला होता. मात्र, त्याची प्रकृती अत्यंत गंभीर असल्याने उपचारादरम्यान त्याचाही मृत्यू झाला.
घटनेची माहिती मिळताच जम्मू-काश्मीर पोलीस, भारतीय लष्कर आणि इतर सुरक्षा दलांनी संपूर्ण परिसराला वेढा घालत मोठे शोध अभियान सुरू केले. हल्लेखोरांचा शोध घेण्यासाठी व्यापक कॉम्बिंग ऑपरेशन सुरू असून परिसरात सुरक्षा व्यवस्था वाढवण्यात आली आहे.
जम्मू-काश्मीरचे नायब राज्यपाल मनोज सिन्हा यांनी या हल्ल्याचा तीव्र निषेध केला. या भ्याड हल्ल्यामागील दहशतवाद्यांना कोणत्याही परिस्थितीत सोडले जाणार नाही आणि त्यांना त्यांच्या कृत्याची कठोर किंमत मोजावी लागेल, असे त्यांनी स्पष्ट केले.
हे ही वाचा:
मोदींना लक्ष्य करणारी रुचिका अखेर नरमली; हात जोडून मागितली माफी
दिशाभूल झालेल्यांना योग्य दिशा दाखवूया, भारतासाठी एकत्र येऊया
वंदे भारत ठरली लाईफलाईन; प्रथमच जिवंत हृदयाची वाहतूक
‘आप’ नेता ताहीर हुसेनला अंकित शर्मा हत्येप्रकरणी जन्मठेप
विशेष म्हणजे, गेल्या २१ महिन्यांतील स्थलांतरित मजुरांवरील हा पहिला मोठा दहशतवादी हल्ला मानला जात आहे. यापूर्वी ऑक्टोबर २०२४ मध्ये शोपियांमध्ये एका बिगर-स्थानिक मजुराची हत्या करण्यात आली होती. त्यामुळे या ताज्या हल्ल्यामुळे खोऱ्यात काम करणाऱ्या स्थलांतरित मजुरांच्या सुरक्षेबाबत पुन्हा एकदा गंभीर प्रश्न निर्माण झाले आहेत. दरम्यान, काही वृत्तांनुसार या हल्ल्याची जबाबदारी लष्कर-ए-तैयबाशी संबंधित द रेझिस्टन्स फ्रंट (TRF) या संघटनेने स्वीकारल्याचा दावा करण्यात आला आहे. मात्र, याबाबत अधिकृत स्तरावर अद्याप अंतिम पुष्टी करण्यात आलेली नाही.