सोशल मीडियाच्या माध्यमातून पाकिस्तानस्थित दहशतवाद्यांशी संबंधित ऑडिओ क्लिप आणि भडकावू साहित्य प्रसारित केल्याच्या संशयावरून झारखंडमधील कोडरमा जिल्ह्यात पाच जणांना ताब्यात घेण्यात आले आहे. ही कारवाई केंद्रीय गुप्तचर विभाग (आयबी) आणि स्थानिक पोलिसांनी संयुक्तपणे केली.
केंद्रीय गुप्तचर यंत्रणेला काही सोशल मीडिया खात्यांद्वारे आक्षेपार्ह आणि चिथावणीखोर स्वरूपाच्या ऑडिओ क्लिप तसेच इतर सामग्री प्रसारित केली जात असल्याची माहिती मिळाली होती. प्राथमिक पडताळणीनंतर ही माहिती कोडरमा पोलिसांकडे देण्यात आली. त्यानंतर रविवारी उशिरा आयबीचे पथक कोडरमामध्ये दाखल झाले आणि सोमवारी सकाळी स्थानिक पोलिसांसह सतगावां पोलीस ठाण्याच्या हद्दीतील माधोपूर गावात छापेमारी करण्यात आली.
या कारवाईत पाच जणांना ताब्यात घेण्यात आले. तपास यंत्रणांच्या माहितीनुसार, पाकिस्तानस्थित दहशतवादी मसूद अझहर याची कथित ऑडिओ क्लिप आणि इतर सामग्री सोशल मीडियावर प्रसारित करून काही मुस्लिम युवकांना देशाविरोधात आणि इतर धर्मांविरोधात भडकवण्याचा प्रयत्न केला जात असल्याचा संशय आहे.
छापेमारीदरम्यान काही मोबाईल फोन, इलेक्ट्रॉनिक उपकरणे आणि अन्य साहित्य जप्त करण्यात आले आहे. जप्त करण्यात आलेल्या डिजिटल उपकरणांची फॉरेन्सिक तपासणी करून संबंधित सामग्रीचा स्रोत काय होता, ती किती जणांपर्यंत पोहोचली आणि त्यामागे एखादे संघटित नेटवर्क कार्यरत होते का, याचा तपास सुरू आहे. मात्र, या प्रकरणाबाबत सुरक्षा यंत्रणा किंवा कोडरमा पोलिसांकडून अद्याप अधिकृत पुष्टी करण्यात आलेली नाही. चौकशी आणि तांत्रिक तपास पूर्ण झाल्यानंतरच सविस्तर माहिती दिली जाईल, असे पोलिस अधिकाऱ्यांनी सांगितले.
हे ही वाचा:
नेताजींचे पणतू चंद्रकुमार बोस यांचा तृणमूलला रामराम
पासपोर्ट कालबाह्य, व्हिसाही संपला; स्पा सेंटरमधून थायलंडची महिला ताब्यात
डॉलरची घसरण अन् मौल्यवान धातूंना बूस्ट
चिन्मय कृष्ण दास यांना दोन प्रकरणांत जामीन; तुरुंगातून सुटकेची शक्यता नाही
दरम्यान, यापूर्वीही कोडरमा जिल्ह्याचे नाव अशाच एका प्रकरणामुळे चर्चेत आले होते. कोडरमाची रहिवासी शमा परवीन हिला गुजरात एटीएसने बंगळुरूहून अटक केली होती. तिच्यावर अल-कायदा इन इंडियन सबकॉन्टिनेंट (AQIS) या संघटनेशी संबंधित कथित मॉड्यूलशी संबंध असल्याचा तसेच सोशल मीडियाच्या माध्यमातून युवकांना कट्टरतावादाकडे वळवण्याचा आरोप करण्यात आला होता.