कर्नाटकातील अन्न सुरक्षा विभागाने बंगळुरूतील इंदिरा कँटीनच्या स्वयंपाकघरांवर आणि साठवणूक केंद्रांवर धडक कारवाई केली आहे. अन्नपदार्थांची अस्वच्छ पद्धतीने साठवणूक, अन्न हाताळणीतील त्रुटी, नियमबाह्य लेबलिंग आणि चुकीचे ब्रँडिंग आढळून आल्याने गोत्तीगेरे, लिंगराजपुरम आणि सिंगसंद्रा येथील इंदिरा कँटीनची तपासणी करण्यात आली. या तिन्ही ठिकाणी नियमांचे उल्लंघन आढळल्याने नोटिसा बजावण्यात आल्या असून, कायदेशीर कारवाईसाठी प्रकरणे दाखल करण्याची शिफारस करण्यात आली आहे.
यापैकी गोत्तीगेरे येथील इंदिरा कँटीनचे गोदाम अस्वच्छ परिस्थितीमुळे सील करण्यात आले. तपासणीदरम्यान अन्नपदार्थांची योग्य पद्धतीने साठवणूक आणि हाताळणी होत नसल्याचे अधिकाऱ्यांच्या निदर्शनास आले. त्यामुळे अन्न सुरक्षेच्या नियमांचे पालन होत नसल्याचे स्पष्ट झाल्यानंतर संबंधित गोदामाविरोधात कारवाई करण्यात आली. तपासणीदरम्यान डाळी, हळद पावडर, खाद्यतेल, गूळ, मीठ आणि साखर यांसह तयार खाद्यपदार्थांचे नमुने घेण्यात आले आहेत. हे नमुने प्रयोगशाळेत तपासणीसाठी पाठवण्यात आले असून, अहवालानंतर पुढील कारवाई केली जाणार आहे.
तसेच या मोहिमेदरम्यान होस्कोटे तालुक्यातील झेप्टोच्या गोदामात अत्यंत अस्वच्छ परिस्थिती आढळून आली. हे गोदाम निप्पॉन एक्स्प्रेसकडून चालवले जात असल्याची माहिती आहे. तपासणीनंतर अधिकाऱ्यांनी गोदाम सील केले असून, संबंधित खाद्य व्यवसाय ऑपरेटरविरोधात कायदेशीर कारवाईची शिफारस केली आहे. तपासणीदरम्यान गोदामाच्या परिसरात खाद्यपदार्थांची उघडी पाकिटे, शीतपेयांच्या बाटल्या, दूधजन्य पदार्थ अस्ताव्यस्त ठेवलेले तसेच कचरा आणि साचलेली घाण आढळली. खाद्यपदार्थांच्या साठवणूक आणि हाताळणीच्या पद्धतीबाबतही अधिकाऱ्यांनी गंभीर आक्षेप नोंदवले. तसेच लेबलिंगमध्ये नियमांचे उल्लंघन, चुकीचे ब्रँडिंग आणि अन्न सुरक्षा नियमांचे पालन न केल्याचे आढळले.
हे ही वाचा:
नेताजींच्या नातवाची ‘आझाद हिंद’च्या झेंड्याखाली नवी राजकीय वाटचाल?
पान मसाल्याची ‘प्लास्टिक पुडी’ आता बंद! कागद, टिन, काचेचा वापर अनिवार्य
राहुल गांधींच्या त्या विदेश दौऱ्यात कोण होते सोबत ? फोटो केला व्हायरल
चित्रपट चालो न चालो, पॉपकॉर्नची कमाई मात्र जोरात
दरम्यान, बंगळुरू शहर आणि ग्रेटर बंगळुरू परिसरात अन्न सुरक्षा विभागाची व्यापक तपासणी मोहीम सुरू आहे. या मोहिमेत आतापर्यंत ६० थ्री-स्टार आणि फाइव्ह-स्टार हॉटेल्सची तपासणी करण्यात आली असून, ७७ खाद्यपदार्थांचे नमुने प्रयोगशाळेतील तपासणीसाठी घेण्यात आले आहेत. अन्नपदार्थांची गुणवत्ता आणि स्वच्छतेबाबत कोणतीही तडजोड केली जाणार नाही. अन्न सुरक्षा नियमांचे उल्लंघन करणाऱ्या आस्थापनांवर कठोर कायदेशीर कारवाई केली जाईल, असा इशारा विभागाने दिला आहे.