चित्रपट चालो न चालो, पॉपकॉर्नची कमाई मात्र जोरात

सिनेमागृहात चित्रपट पाहण्यासाठी गेलेल्या प्रेक्षकांच्या खिशाला सर्वाधिक चाट कशामुळे बसते, असा प्रश्न विचारला तर तिकीटानंतर पॉपकॉर्न, समोसा आणि शीतपेयांचीच नावे पुढे येतात. मात्र, प्रेक्षकांसाठी महाग वाटणारे हे खाद्यपदार्थ मल्टिप्लेक्स कंपन्यांसाठी मात्र मोठ्या कमाईचे साधन ठरले आहेत. याचीच झलक पीव्हीआर आयनॉक्सच्या आर्थिक वर्ष २०२६ मधील आकडेवारीतून समोर आली आहे. कंपनीने खाद्यपदार्थ आणि पेयांच्या विक्रीतून तब्बल २,०८८ कोटी रुपयांचा महसूल मिळवला आहे.

पीव्हीआर आयनॉक्सचा आर्थिक वर्ष २०२६ मधील एकूण महसूल ६,७४३ कोटी रुपये होता. त्यापैकी तब्बल ३१ टक्के महसूल खाद्यपदार्थ आणि पेयांच्या विक्रीतून आला. म्हणजेच चित्रपटाची तिकिटे विकून मिळणाऱ्या उत्पन्नानंतर पॉपकॉर्न, समोसे, पेये आणि इतर खाद्यपदार्थ हा कंपनीसाठी दुसरा सर्वात मोठा महसूल स्रोत ठरला आहे. तिकीट विक्रीतून कंपनीला ३,५३० कोटी रुपयांचा महसूल मिळाला, जो एकूण महसुलाच्या सुमारे ५२ टक्के आहे. याशिवाय जाहिरातींमधून ४६४ कोटी रुपये, तर सुविधा शुल्कातून ६६१ कोटी रुपये कंपनीच्या तिजोरीत जमा झाले.
हे ही वाचा:
बाब-अल-मंदेब सामुद्रधुनीत मालवाहू जहाजावर हल्ला; तीन जणांचा मृत्यू

सीरियाचे माजी राष्ट्राध्यक्ष बशर अल-असद यांना फाशीची शिक्षा

मल्टिप्लेक्स व्यवसायातील हे गणित समजून घेतले तर खाद्यपदार्थांचा व्यवसाय कंपन्यांसाठी एवढा महत्त्वाचा का आहे, हे स्पष्ट होते. चित्रपटाच्या तिकीट विक्रीतून मिळणाऱ्या उत्पन्नाचा काही हिस्सा चित्रपट निर्माते आणि वितरकांसोबत वाटून घ्यावा लागतो. त्यामुळे तिकीट विक्रीतून मिळालेली संपूर्ण रक्कम थिएटर कंपनीकडे राहत नाही. मात्र पॉपकॉर्न, समोसा, सँडविच, शीतपेये आणि इतर खाद्यपदार्थांच्या विक्रीतून मिळणाऱ्या महसुलावर कंपनीला तुलनेने अधिक चांगले नफ्याचे प्रमाण मिळते. त्यामुळे एखादा चित्रपट बॉक्स ऑफिसवर अपेक्षेइतकी कमाई करू शकला नाही, तरी खाद्यपदार्थांचा व्यवसाय कंपनीच्या महसुलाला मोठा आधार देतो.

यामुळेच पीव्हीआर आयनॉक्सने आता खाद्यपदार्थांच्या व्यवसायाकडे केवळ सिनेमागृहातील पूरक सेवा म्हणून न पाहता स्वतंत्र व्यवसायाच्या रूपात पाहण्यास सुरुवात केली आहे. कंपनीने देवयानी इंटरनॅशनलसोबत संयुक्त उपक्रम सुरू केला असून, भविष्यात शॉपिंग मॉलमध्ये स्वतंत्र खाद्यविभाग आणि फूड कोर्ट उभारण्याची योजना आखली आहे. यामुळे चित्रपट पाहण्यासाठी थिएटरमध्ये न आलेल्या ग्राहकांकडूनही कंपनीला खाद्यपदार्थांच्या व्यवसायातून कमाई करता येणार आहे.

याशिवाय उच्च दर्जाच्या खाद्यपदार्थांच्या विक्रीवरही कंपनीचा भर आहे. घरबसल्या खाद्यपदार्थ मागवणाऱ्या ग्राहकांपर्यंत पोहोचण्यासाठी स्विगी आणि झोमॅटोसारख्या ऑनलाइन व्यासपीठांचाही वापर केला जात आहे. त्यामुळे पीव्हीआर आयनॉक्सचा व्यवसाय आता केवळ ‘चित्रपट दाखवणे’ या पारंपरिक चौकटीत राहिलेला नाही. तिकीट विक्रीसोबत खाद्यपदार्थ, जाहिराती, सुविधा शुल्क आणि थिएटरबाहेरील खाद्य व्यवसाय अशा विविध माध्यमांतून महसूल वाढवण्याचा कंपनीचा प्रयत्न आहे.

विशेष म्हणजे आर्थिक वर्ष २०२६ मध्ये पीव्हीआर आयनॉक्सचा एकूण महसूल मागील वर्षाच्या तुलनेत १६ टक्क्यांनी वाढून ६,७४३ कोटी रुपयांवर पोहोचला आहे. या वाढीत खाद्यपदार्थ आणि पेयांच्या व्यवसायाचा वाटा अत्यंत महत्त्वाचा ठरला आहे. त्यामुळे सिनेमागृहात चित्रपट पाहताना प्रेक्षकांच्या हातातील पॉपकॉर्नची बादली केवळ मनोरंजनाचा भाग राहिलेली नाही, तर मल्टिप्लेक्स कंपन्यांच्या कमाईतील एक मोठे इंजिन बनली आहे.

थोडक्यात, चित्रपट हिट झाला तर निर्माते आणि कलाकारांची कमाई वाढते; पण चित्रपट फ्लॉप झाला तरी पॉपकॉर्नचा व्यवसाय पीव्हीआर आयनॉक्ससाठी हिट ठरत आहे. खाद्यपदार्थांच्या विक्रीतून मिळालेला २,०८८ कोटी रुपयांचा महसूल हा मल्टिप्लेक्स उद्योगाच्या बदलत्या कमाईच्या मॉडेलचे मोठे उदाहरण ठरले आहे.