प्रेमसंबंधात निर्माण झालेला कथित दुरावा अखेर कर्नाटकच्या टूमकुरु जिल्ह्यात एका भीषण घटनेत परिवर्तित झाला. अपहरणाचा आरोप असलेला एक युवक कारमध्ये झालेल्या प्रचंड स्फोटात जिवंत जळून मरण पावला. हा स्फोट एका महिलेने धावत्या कारमधून जीव वाचवण्यासाठी उडी मारल्यानंतर काही क्षणांतच झाला.
ही घटना शनिवारी सिरा तालुक्यातील जोगीहळ्ळी परिसरात, राष्ट्रीय महामार्ग-४८ वर घडली. महामार्गावरून धावणाऱ्या कारमध्ये अचानक स्फोट होऊन वाहनाला आग लागली.
या स्फोटात ३० वर्षीय नागेंद्र याचा जागीच मृत्यू झाला. तर संबंधित महिला आणि कॅब चालक प्रवीण हे जखमी झाले असून त्यांना उपचारासाठी तुमकुरू जिल्हा रुग्णालयात दाखल करण्यात आले.
प्रेमसंबंध संपल्यानंतर वाद
पोलिसांच्या माहितीनुसार, नागेंद्र आणि संबंधित महिला यांच्यात पूर्वी प्रेमसंबंध होते. महिला बेंगळुरू येथे ऑपरेशन थिएटर तंत्रज्ञ म्हणून कार्यरत आहे.
काही वैयक्तिक कारणांमुळे दोघांचे संबंध तुटले होते. त्यानंतर महिलेने नागेंद्रचा मोबाईल क्रमांकही ब्लॉक केला होता.
हे ही वाचा:
मुंबईपासून काही तासांत… पावसाचं नंदनवन!
‘युगप्रवर्तक डॉ. हेडगेवार’ नाट्याविष्काराचे आयोजन
दिल्लीसह उत्तर भारतात भूकंपाचे धक्के
विमानापेक्षा इमान महत्त्वाचं असते
महिलेचे कथित अपहरण
पोलिसांनी दिलेल्या माहितीनुसार, शनिवारी सकाळी नागेंद्र बेंगळुरूतील जयनगर येथील महिलेच्या भाड्याच्या घरात गेला. दोघांमध्ये वाद झाल्यानंतर त्याने महिलेला जबरदस्तीने पिवळ्या नंबर प्लेटच्या उबर कॅबमध्ये बसवून नेल्याचा आरोप आहे.
महिला बेपत्ता झाल्यानंतर तिच्या पालकांनी जयनगर पोलीस ठाण्यात अपहरणाची तक्रार दाखल केली. पोलिसांच्या प्राथमिक तपासानुसार, अंकोलाच्या दिशेने जात असताना नागेंद्रने महिलेला ठार मारून स्वतःही आत्महत्या करण्याची धमकी दिली होती.
त्याच्याकडे स्फोटकासारखी वस्तू होती आणि प्रवासादरम्यान त्याने ती महिलेस दाखवल्याचा संशय पोलिसांनी व्यक्त केला आहे.
चाकूने हल्ला, महिलेची थरारक सुटका
जोगीहळ्ळीजवळ पोहोचल्यावर नागेंद्रने धावत्या कारमध्येच महिलेवर चाकूने हल्ला केल्याचा आरोप आहे. ही परिस्थिती पाहून चालक प्रवीणने तत्काळ कार थांबवली. त्याचा फायदा घेत महिलेने कारचे दार उघडून बाहेर उडी मारत स्वतःचा जीव वाचवला.
काही क्षणांतच भीषण स्फोट
महिला कारमधून बाहेर पडताच काही क्षणांतच वाहनात जोरदार स्फोट झाला आणि संपूर्ण कार आगीच्या भक्ष्यस्थानी पडली.
नागेंद्र कारमध्येच अडकला आणि मदत पोहोचण्यापूर्वीच जिवंत जळून त्याचा मृत्यू झाला. या स्फोटामुळे राष्ट्रीय महामार्गावर एक किलोमीटरपेक्षा अधिक लांबीची वाहतूक कोंडी झाली.
पोलिसांचा तपास सुरू
टुमकुरू जिल्ह्याचे पोलीस अधीक्षक अशोक के. व्ही. यांनी सांगितले की, प्राथमिक तपासात नागेंद्रकडे स्फोटक पदार्थ असल्याचे दिसून येत असून त्याने जाणूनबुजून स्फोट घडवून आणल्याचा संशय आहे.
पोलिसांनी कारमधून बॉम्बसदृश स्फोटक साहित्य जप्त केले आहे. नेमका कोणत्या प्रकारचा स्फोटक वापरण्यात आला, त्याचा स्फोट कसा झाला आणि ते स्फोटक कोठून आणले गेले, याचा सखोल तपास सुरू आहे.
या प्रकरणी कळंबेला पोलिसांनी गुन्हा दाखल केला असून, या भीषण घटनेमागील संपूर्ण घटनाक्रमाचा तपास सुरू आहे.