मुंबईच्या वडाळा परिसरात रविवारी बजरंग दल आणि विश्व हिंदू परिषद (विहिप) या संघटनांच्या कार्यकर्त्यांची पोलिसांसोबत झटापट झाली. या झटापटीदरम्यान पोलिसांनी बळाचा वापर केला, ज्यामध्ये अनेक कार्यकर्ते जखमी झाले. परिस्थिती नियंत्रणात ठेवण्यासाठी परिसरात मोठ्या प्रमाणात पोलिस बंदोबस्त तैनात करण्यात आला असून काही जणांना ताब्यात घेण्यात आले आहे.
घटना कशी घडली?
ही घटना तेव्हा घडली जेव्हा राम नवमीनिमित्त शोभा यात्रेचे आयोजन करण्यासाठी बजरंग दल आणि विहिपचे कार्यकर्ते वडाळ्यातील बरकत अली चौकात जमले होते. हिंदू संघटनांचा आरोप आहे की पोलिसांनी शोभा यात्रा काढण्याची परवानगी नाकारली आणि ती रोखण्याचा प्रयत्न केला. या अगोदरही, १३ एप्रिल रोजी अंबेडकर जयंतीच्या निमित्ताने, या संघटनांनी शोभा यात्रा काढण्याची योजना आखली होती. परंतु पोलिसांनी त्या दिवशी कायदा आणि सुव्यवस्थेचा हवाला देत परवानगी नाकारली होती.
“आम्ही शांततेत यात्रा काढू इच्छित होतो”
हिंदू संघटनांच्या कार्यकर्त्यांनी सांगितले की, “राम नवमीसारख्या पवित्र दिवशी शोभा यात्रा काढणे हा आमचा धार्मिक अधिकार आहे. पोलिसांचा हा विरोध आमच्या धार्मिक स्वातंत्र्यावर गदा आणणारा आहे.” “आम्ही शांततेत शोभा यात्रा काढत होतो, पण पोलिसांनी कोणतीही योग्य कारणं न देता आम्हाला रोखलं आणि लाठीचार्ज केला. आमचे अनेक सहकारी जखमी झाले आहेत.”
पोलिसांनी स्पष्ट केले की, “यात्रेसाठी आवश्यक ती पूर्वपरवानगी घेण्यात आलेली नव्हती, त्यामुळे कायद्याचा भंग होऊ नये म्हणून हस्तक्षेप करावा लागला. काही कार्यकर्ते आक्रमक झाल्यामुळे कमी प्रमाणात बळाचा वापर करणे गरजेचे ठरले. सध्या परिस्थिती नियंत्रणात आहे.”
हे ही वाचा:
संग्राम थोपटेंच ठरलं, ‘या’ तारखेला करणार भाजपात प्रवेश!
‘उन्नीस असो वा बीस… आपला यॉर्कर फिक्स!’ : आवेश खान
‘बंगाली हिंदूंना वाचवा’, सुरक्षेसाठी परवानाधारक शस्त्रे द्या!
घटनेनंतर, वडाळा पोलिसांव्यतिरिक्त अतिरिक्त फौजफाटा घटनास्थळी बोलावण्यात आला असून परिसरात गस्त वाढवण्यात आली आहे, जेणेकरून कोणतीही अप्रिय घटना घडू नये.
स्थानिक रहिवाशांच्या मते, बरकत अली चौक व आजूबाजूच्या परिसरात तणावपूर्ण वातावरण आहे, पण पोलिसांच्या सततच्या उपस्थितीमुळे परिस्थिती नियंत्रणात आहे. पोलिसांनी तपास सुरू केला असून सीसीटीव्ही फुटेज आणि इतर पुरावे तपासले जात आहेत.
