लक्ष्मी मित्तल यांच्या युक्रेनमधील स्टील प्लांटवर रशियाचा हल्ला

रशिया-युक्रेन युद्धाची तीव्रता पुन्हा वाढताना दिसत आहे. भारतीय उद्योगपती लक्ष्मी मित्तल यांच्या मालकीच्या आर्सेलरमित्तलच्या युक्रेनमधील क्रिव्ही रिह स्टील प्लांटवर रशियाने क्षेपणास्त्र हल्ला केला. रविवारी झालेल्या या हल्ल्यात दोन कामगारांचा मृत्यू झाला असून १४ जण जखमी झाले आहेत. हल्ल्यानंतर प्लांटमधील काही महत्त्वाच्या उत्पादन प्रक्रिया अंशतः बंद करण्यात आल्या आहेत.

क्रिव्ही रिह येथील आर्सेलरमित्तल क्रिव्ही रिह हा युक्रेनमधील सर्वात मोठ्या स्टील उत्पादक प्रकल्पांपैकी एक आहे. हा प्लांट भारतीय वंशाचे अब्जाधीश उद्योगपती लक्ष्मी मित्तल यांच्या आर्सेलरमित्तल समूहाचा भाग आहे. रशियाच्या हल्ल्यात प्लांटमधील ऊर्जा व्यवस्था आणि ब्लास्ट फर्नेसशी संबंधित महत्त्वाच्या सुविधांचे नुकसान झाले. त्यामुळे उत्पादनावर परिणाम झाला असून कंपनीला काही कामकाज तात्पुरते थांबवावे लागले. कंपनीनेही आपल्या एका ठिकाणी मिसाइल हल्ला झाल्याची आणि कामकाज अंशतः स्थगित केल्याची पुष्टी केली आहे.

विशेष म्हणजे, क्रिव्ही रिह हे युक्रेनचे राष्ट्राध्यक्ष व्होलोदिमिर झेलेन्स्की यांचे जन्मगाव आहे. या शहरावर यापूर्वीही रशियाकडून हल्ले झाले आहेत. रविवारी क्रिव्ही रिह शहरात झालेल्या आणखी एका हल्ल्यात एका व्यक्तीचा मृत्यू झाला. युक्रेनच्या इतर भागांमध्येही रशियन हल्ल्यांमध्ये मृत्यू झाल्याचे वृत्त आहे.

रशियाच्या संरक्षण मंत्रालयाने क्रिव्ही रिहमधील धातू उद्योगाशी संबंधित प्रकल्पाला लक्ष्य केल्याचे सांगितले आहे. याशिवाय कीव्हमधील काही लष्करी-औद्योगिक ठिकाणांनाही लक्ष्य करण्यात आल्याचा रशियाचा दावा आहे. दुसरीकडे, झेलेन्स्की यांनी रशियावर नागरी पायाभूत सुविधांवर हल्ले केल्याचा आरोप केला आहे. त्यांच्या म्हणण्यानुसार, रशियन क्षेपणास्त्रांच्या टप्प्यात येणाऱ्या ठिकाणांना लक्ष्य केले जात आहे.

हे ही वाचा:

कच्च्या तेलाची धग बाजाराला; सेन्सेक्स ३०० अंकांहून अधिक घसरला

“मला कार्यमुक्त करा” शहजाद पूनावाला यांचा पुन्हा राजीनामा

अरशदीप सिंह डांग ठरले रॉयल एअर फोर्सचे पहिले शीख फायटर पायलट

बिहारच्या मंदिरात चेंगराचेंगरी; सात भाविकांचा मृत्यू

हा हल्ला अशा वेळी झाला आहे, जेव्हा युक्रेनने रशियावर मोठ्या प्रमाणात ड्रोन हल्ले केले होते. रशियाच्या संरक्षण मंत्रालयाच्या म्हणण्यानुसार, रात्रीच्या काळात देशभरात ८२२ युक्रेनियन ड्रोन पाडण्यात आले. मॉस्कोच्या दिशेने सुमारे ६०० ड्रोन येत असल्याचे आढळल्याचा दावा मॉस्कोचे महापौर सर्गेई सोब्यानिन यांनी केला. याशिवाय रशियातील रोस्तोव्ह भागातही मोठ्या प्रमाणात ड्रोन हल्ले झाले. या हल्ल्यांमध्ये काही नागरिकांचा मृत्यू झाल्याचे स्थानिक अधिकाऱ्यांनी सांगितले.