लाल समुद्र आणि एडनच्या आखातातील वाढत्या सुरक्षेच्या धोक्यांदरम्यान शुक्रवारी (१७ जुलै) येमेनच्या दक्षिण किनाऱ्याजवळ एडनच्या आखातात एका रासायनिक टँकरवर सशस्त्र हल्लेखोरांनी चढाई करून जहाजाचा ताबा घेतल्याची धक्कादायक घटना घडली आहे. प्राथमिक माहितीनुसार, ‘असाना’ नावाच्या केमिकल टँकरवर अज्ञात बंदूकधाऱ्यांनी ताबा मिळवला असून, ही घटना हूती बंडखोरांपेक्षा सोमाली समुद्री चाच्यांच्या कारवाईशी संबंधित असण्याची शक्यता व्यक्त केली जात आहे.
ब्रिटनच्या युनायटेड किंगडम मेरीटाइम ट्रेड ऑपरेशन्स (UKMTO) या संस्थेने दिलेल्या माहितीनुसार, येमेनमधील अल मुकल्ला बंदराच्या सुमारे ६५ सागरी मैल दक्षिणेला पूर्वेकडे प्रवास करत असताना या जहाजावर अनधिकृत सशस्त्र व्यक्तींनी चढाई केली. हल्लेखोरांची संख्या, त्यांची ओळख तसेच जहाजावरील कर्मचाऱ्यांची स्थिती अद्याप स्पष्ट झालेली नाही.
सागरी सुरक्षा संस्थांच्या प्राथमिक तपासानुसार, हा हल्ला येमेनमधील इराणसमर्थक हूती बंडखोरांऐवजी सोमाली समुद्री चाच्यांनी केल्याची शक्यता अधिक आहे. जहाजावरील सशस्त्र सुरक्षा पथक नसल्याचा फायदा घेत चाच्यांनी जहाजावर ताबा मिळवल्याचा अंदाज व्यक्त करण्यात आला आहे. जहाजाने सकाळी संकटाचा संदेश (Distress Call) पाठवला होता. या घटनेनंतर परिसरात सुरक्षा वाढवण्यात आली असून, दक्षिण कोरियाने आपले युद्धनौकेचे पथक घटनास्थळी रवाना केले आहे. विविध आंतरराष्ट्रीय सागरी सुरक्षा संस्था जहाजाचा मागोवा घेत असून परिस्थितीवर बारकाईने लक्ष ठेवून आहेत.
ही घटना अशा वेळी घडली आहे, जेव्हा अमेरिकेसोबतचा तणाव वाढल्यास लाल समुद्रातील तेलवाहतुकीचा मार्ग बंद करण्यासाठी सज्ज राहण्याचे निर्देश इराणने हूती बंडखोरांना दिल्याचे वृत्त समोर आले आहे. त्यामुळे एडनचा आखात, बाब-अल-मंदेब सामुद्रधुनी आणि लाल समुद्रातील जहाजवाहतुकीबाबत जागतिक स्तरावर चिंता वाढली आहे.
हे ही वाचा:
महेश ट्युटोरियल्सच्या ३३ शाखांना टाळे; विद्यार्थ्यांचे भवितव्य टांगणीला
मुंबई लोकलमध्ये ‘सीट वॉर’चा कळस; महिला डब्यात पेपर स्प्रे फवारला
पाणबुड्यांचा ‘कर्दनकाळ’ भारताच्या ताफ्यात; MH-60R सीहॉक हेलिकॉप्टर दाखल
हरित रेल्वे क्रांतीची नांदी; पहिली हायड्रोजन ट्रेन जींदहून सोनीपतसाठी रवाना
एडनचा आखात हा अरबी समुद्र आणि लाल समुद्राला जोडणारा अत्यंत महत्त्वाचा आंतरराष्ट्रीय व्यापारी मार्ग आहे. भारतासह आशिया, युरोप आणि मध्यपूर्वेतील मोठ्या प्रमाणावरील तेल व मालवाहतूक या मार्गाने होते. गेल्या काही आठवड्यांत या परिसरात चाचेगिरीच्या घटनांमध्ये वाढ झाली असून, नुकतेच भारतीय नौदलानेही एका व्यापारी जहाजावरील चाचेगिरीचा प्रयत्न हाणून पाडला होता. त्यामुळे या नव्या घटनेमुळे आंतरराष्ट्रीय जहाजवाहतूक आणि ऊर्जा पुरवठ्याच्या सुरक्षेबाबत पुन्हा चिंता व्यक्त केली जात आहे.