बेल्जियममध्ये शतकाहून अधिक काळातील सर्वात भीषण वणव्याने हाहाकार माजवला आहे. पूर्व बेल्जियममधील हाय फेन्स या प्रसिद्ध निसर्ग राखीव क्षेत्रात लागलेल्या आगीने आतापर्यंत तब्बल ३ हजार २०० हेक्टरहून अधिक जंगल आणि नैसर्गिक अधिवास जाळून खाक केला आहे. आगीची तीव्रता इतकी प्रचंड आहे की, शेकडो नागरिकांना सुरक्षित स्थळी हलवावे लागले असून जर्मनीच्या सीमेलगतच्या भागातही सतर्कता वाढवण्यात आली आहे. बेल्जियमच्या इतिहासातील १९११ नंतरची ही सर्वात मोठी वनाग्नीची घटना मानली जात आहे.
हाय फेन्स परिसर सामान्यतः थंड आणि दमट हवामानासाठी ओळखला जातो. मात्र, यंदाच्या विक्रमी उष्णतेमुळे आणि दीर्घकाळाच्या कोरड्या हवामानामुळे या भागातील वनस्पती आणि जंगलातील जमीन मोठ्या प्रमाणात कोरडी पडली. त्यामुळे आग वेगाने पसरली. विशेष म्हणजे या परिसरातील जमिनीत मोठ्या प्रमाणावर पीट असल्याने आग केवळ जमिनीच्या पृष्ठभागावरच नाही, तर जमिनीखालीही धुमसत आहे. त्यामुळे वरून पाऊस पडून काही भागातील ज्वाळा शांत झाल्या तरी जमिनीखालील आग पुन्हा भडकण्याचा धोका कायम आहे.
हे ही वाचा:
ग्रँडमास्टर दिव्या देशमुखला अर्जुन पुरस्कार
चुलत्यांशी विवाह करण्यावर बंदीची अफवा; भोपाळमध्ये निकाहसाठी धावाधाव
काबूलमध्ये शाळेजवळ हातबॉम्बचा स्फोट; ५० हून अधिक मुलं जखमी
८व्या वेतन आयोगाचा पेन्शनधारकांना मोठा दिलासा
आगीवर नियंत्रण मिळवण्यासाठी सुमारे ५०० अग्निशामक, सैनिक, शेतकरी आणि आपत्कालीन पथके दिवसरात्र प्रयत्न करत आहेत. बेल्जियमला जर्मनी, नेदरलँड्स, स्वीडन आणि इतर युरोपीय देशांकडूनही मदत मिळत आहे. हेलिकॉप्टर आणि पाणी फवारणाऱ्या विमानांच्या सहाय्याने आगीच्या विविध भागांवर पाण्याचा मारा केला जात आहे. मात्र, दाट जंगल, दलदलीचा प्रदेश आणि अवघड भूप्रदेशामुळे अग्निशमन पथकांना अनेक ठिकाणी थेट पोहोचणे कठीण ठरत आहे.
आगीचा फैलाव जर्मनीच्या सीमेकडे झाल्याने सीमावर्ती भागातही चिंता वाढली होती. जर्मनीतील मॉन्सशॉ शहराच्या परिसरातील नागरिकांना खबरदारीचा इशारा देण्यात आला होता. मात्र, सोमवारी झालेल्या पावसामुळे आणि तापमानात झालेल्या घसरणीमुळे आगीचा जर्मनीच्या दिशेने होणारा विस्तार काही प्रमाणात थांबला. तरीही बेल्जियन प्रशासनाने परिस्थिती पूर्णपणे नियंत्रणात आल्याचे मानलेले नाही. काही भागांमध्ये आग अजूनही धुमसत असून तेथे पोहोचणे धोकादायक असल्याचे अधिकाऱ्यांनी सांगितले आहे.
या आगीत जवळपास ६०० नागरिकांना सुरक्षित स्थळी हलवण्यात आले आहे. सुदैवाने आतापर्यंत मोठ्या प्रमाणावर जीवितहानी किंवा निवासी इमारतींचे नुकसान झाल्याचे वृत्त नाही. मात्र, हाय फेन्सच्या जैवविविधतेला मोठा फटका बसला आहे. अनेक वर्षे विकसित झालेल्या जंगलाचा मोठा भाग नष्ट झाल्याने या परिसराच्या पर्यावरणीय पुनर्बांधणीला दीर्घ काळ लागू शकतो.