पंतप्रधान नरेंद्र मोदी हे दोन दिवसीय स्लोव्हाकिया देशाच्या दौऱ्यावर आहेत. याच पार्श्वभूमीवर स्लोव्हाकियाचे पंतप्रधान रॉबर्ट फिको यांनी सोमवार, १५ जून रोजी भारताच्या आर्थिक प्रगतीचे, डिजिटलीकरणातील यशाचे आणि कृत्रिम बुद्धिमत्ता (AI) क्षेत्रातील झपाट्याने होत असलेल्या विकासाचे कौतुक केले. भारत आज अनेक विकसित देशांनाही मागे टाकत असल्याचे त्यांनी नमूद केले.
ब्रातिस्लावा येथे पंतप्रधान नरेंद्र मोदी यांच्यासोबत झालेल्या द्विपक्षीय चर्चेनंतर आयोजित संयुक्त पत्रकार परिषदेत बोलताना फिको म्हणाले की, भारत आणि स्लोव्हाकिया अनेक समान मुद्द्यांशी जोडलेले आहेत. जगातील सर्वाधिक लोकसंख्या असलेल्या देशाच्या पंतप्रधानांचे स्लोव्हाकियात स्वागत करणे ही आमच्यासाठी अभिमानाची बाब असल्याचे त्यांनी सांगितले. ते म्हणाले, “भारत सध्या जगातील पाचवी सर्वात मोठी अर्थव्यवस्था आहे आणि तिसरी सर्वात मोठी अर्थव्यवस्था बनण्याचे ध्येय ठेवून वाटचाल करत आहे. प्रत्येक क्षेत्रात मिळालेल्या यशाबद्दल मी पंतप्रधान मोदी यांचे अभिनंदन करतो.”
भारताच्या डिजिटलीकरण आणि एआय क्षेत्रातील उल्लेखनीय प्रगतीचा विशेष उल्लेख करताना फिको म्हणाले, “या क्षेत्रात भारताने इतकी वेगवान प्रगती केली आहे की फ्रान्स आणि जर्मनीसारख्या पश्चिम युरोपातील देशांनाही मागे टाकले आहे. अनेक विकसित राष्ट्रांपेक्षा भारत आज पुढे आहे.” भारताचा ६ ते ७ टक्क्यांचा आर्थिक विकासदरही त्यांनी कौतुकास्पद असल्याचे सांगितले. “युरोपियन युनियनला अशी विकासदर साध्य करता आली तर ती मोठी उपलब्धी ठरेल. मात्र सध्या युरोपीय देशांना स्पर्धात्मकता आणि हवामानविषयक उद्दिष्टे यांच्यात समतोल राखण्याचे आव्हान आहे,” असे ते म्हणाले.
रॉबर्ट फिको यांनी संयुक्त राष्ट्र सुरक्षा परिषदेत (UNSC) सुधारणा करण्याची गरज अधोरेखित करत भारताला कायमस्वरूपी सदस्यत्व देण्याचे उघडपणे समर्थन केले. आंतरराष्ट्रीय कायद्याचा सन्मान हाच जागतिक संघर्ष आणि युद्धांवर तोडगा काढण्याचा सर्वोत्तम मार्ग असल्याचे त्यांनी सांगितले. ते म्हणाले, “स्लोव्हाकिया बहुपक्षीय सहकार्याचा समर्थक आहे आणि संयुक्त राष्ट्रांमध्ये सुधारणा व्हाव्यात यासाठी आग्रही आहे. भारतासारख्या देशांना सुरक्षा परिषदेचे कायमस्वरूपी सदस्यत्व मिळाले पाहिजे.”
हे ही वाचा:
मदरशातील शिक्षकासोबत लग्न ठरल्याने मुलीने संपवले जीवन
फाल्टाचा ‘पुष्पा’ झुकला! जहांगीर खानची पुन्हा काढली धिंड
अमेरिका-इराण शांतता कराराचे पंतप्रधान मोदींकडून स्वागत
अमेरिका- इराण शांतता करार पूर्ण! होर्मुझ सामुद्रधुनी आता खुली
फिको यांनी नरेंद्र मोदी यांचे भारतातील सर्वाधिक काळ पंतप्रधानपद भूषवणारे नेते बनल्याबद्दल अभिनंदन केले. विविध राजकीय पक्ष असलेल्या लोकशाही व्यवस्थेत सातत्याने जनतेचा विश्वास मिळवणे ही अत्यंत असामान्य बाब असल्याचे त्यांनी नमूद केले. याशिवाय, भारत आणि युरोपियन युनियन यांच्यात प्रस्तावित मुक्त व्यापार कराराचे (FTA) त्यांनी स्वागत केले. हा महत्त्वाकांक्षी करार लवकरात लवकर प्रत्यक्षात यावा यासाठी स्लोव्हाकिया सर्वतोपरी सहकार्य करेल, असे त्यांनी स्पष्ट केले.