इराण आणि अमेरिका यांच्यातील दोन आठवड्यांच्या शस्त्रसंधीदरम्यान, राष्ट्राध्यक्ष डोनाल्ड ट्रम्प यांनी तेहरानला नव्या धमक्या दिल्या आहेत. ‘ट्रुथ सोशल’वर बोलताना ट्रम्प यांनी इराणसाठी त्यांच्या अटींची आठवण करून देत आपल्या बाजूने काही भूमिका स्पष्ट केल्या आहेत.
“जोपर्यंत झालेल्या ‘खऱ्या करारा’चे पूर्णपणे पालन होत नाही, तोपर्यंत अमेरिकेची सर्व जहाजे, विमाने आणि लष्करी कर्मचारी, अतिरिक्त दारुगोळा, शस्त्रास्त्रे आणि आधीच मोठ्या प्रमाणात कमकुवत झालेल्या शत्रूचा प्राणघातक पाठलाग करून त्याला नष्ट करण्यासाठी योग्य व आवश्यक असलेल्या इतर सर्व गोष्टींसह, इराणमध्ये आणि त्याच्या आसपासच्या परिसरात तैनात राहतील,” असा इशारा ट्रम्प यांनी ‘ट्रुथ सोशल’वर केला आहे.
आपल्या पोस्टमध्ये ट्रम्प यांनी इराणला आठवण करून दिली की, युद्धविरामाच्या अटींनुसार होर्मुझची सामुद्रधुनी पूर्णपणे कार्यरत राहील आणि देश कोणतीही अण्वस्त्रे विकसित करणार नाही, असे वचन देण्यात आले होते. त्यांनी असे सूचित केले की, या कलमांचे कोणतेही उल्लंघन झाल्यास अमेरिकेकडून एक मोठा आणि आजवर कधीही न पाहिलेला हल्ला होऊ शकतो. “जर, कोणत्याही कारणास्तव, हा (अंतिम करार) झाला नाही, ज्याची शक्यता फारच कमी आहे, तर मग ‘शूटिंग’ सुरू होईल, जे पूर्वी कोणीही पाहिले नसेल इतके मोठे, चांगले आणि अधिक दमदार असेल,” असे त्या पोस्टमध्ये लिहिले आहे.
हे ही वाचा:
पाकिस्तानचे आर्थिक स्थैर्य संकटात
“विकसित भारतासाठी मातृशक्तीचे सामर्थ्य अत्यावश्यक”
“आम्ही पाकिस्तानला विश्वासार्ह देश मानत नाही” इस्रायली राजदूत असे का म्हणाले?
दरम्यान, वॉशिंग्टन आणि तेहरान यांच्यात युद्धविरामावर सहमती झाली असूनही, संपूर्ण मध्य-पूर्वेत तणाव कायम आहे. युद्धविराम झाल्यानंतर काही क्षणांतच, तेल अवीवने लेबनॉनमधील हिजबुल्लाहच्या कार्यकर्त्यांना लक्ष्य करून मोठे हवाई हल्ले सुरू केले. पंतप्रधान बेंजामिन नेतान्याहू यांनी दावा केला आहे की, युद्धविराम करारामध्ये हिजबुल्लाहचा समावेश नव्हता. “इराणसोबतच्या शस्त्रसंधीमध्ये हिजबुल्लाहचा समावेश नसेल आणि इस्रायल त्यांच्यावर हल्ले सुरूच ठेवेल,” असे सांगून त्यांनी लेबनॉनशी संबंधित असलेल्या या गटाविरुद्ध लष्करी कारवाया सुरूच राहतील असे संकेत दिले होते.
