उष्णतेत केवळ शरीराला आराम नाही, तर मनालाही शांत ठेवतात सूती कपडे; जाणून घ्या कारणं

देशातील अनेक भागांमध्ये तापमान झपाट्याने वाढत आहे. कडक उन्हात, दमट वातावरणात आणि उष्ण वाऱ्यांच्या झळांमध्ये कोणते कपडे परिधान करावेत, हा मोठा प्रश्न निर्माण होतो. अशा परिस्थितीत उष्णतेपासून बचावासाठी सूती कपड्यांपेक्षा चांगला पर्याय दुसरा नाही.

उन्हाळ्यात तापमान ४५ अंशांपर्यंत पोहोचते. अशावेळी चुकीचे कपडे परिधान केल्यास घाम, चिकटपणा आणि चिडचिड वाढू शकते. तज्ज्ञांच्या मते, या हंगामात नेहमी हलके सूती (कॉटन) कपडेच वापरावेत. योग्य कपडे केवळ शरीराला आराम देत नाहीत, तर मनालाही शांत ठेवतात. शरीर थंड आणि कोरडे राहिल्यास चिडचिड कमी होते आणि दिवसभर ताजेतवाने वाटते. सूती कपडे आरामदायी असण्यासोबतच टिकाऊ आणि पर्यावरणपूरकही आहेत. पारंपरिक पद्धतीनेही आपल्या पूर्वजांनी उन्हाळ्यात सूती कपडे वापरण्याचा सल्ला दिला आहे.

आता प्रश्न असा की, सूती कपडेच का? सूती कापड पूर्णपणे नैसर्गिक असते. त्यात कोणतेही रसायन किंवा कृत्रिम तंतू नसतात. याची सर्वात मोठी खासियत म्हणजे ते हवेला सहज आत-बाहेर जाऊ देते, म्हणजेच ते ‘श्वसनक्षम’ (breathable) असते. त्यामुळे कडक उन्हातही त्वचा थंड आणि कोरडी राहते. याशिवाय सूती कापड घाम उत्तमरीत्या शोषून घेते. घाम कपड्यात पसरून हवेत लवकर सुकतो, त्यामुळे शरीर थंड राहते आणि चिकटपणा जाणवत नाही. याउलट पॉलिस्टर किंवा नायलॉनसारखे कृत्रिम कपडे घाम शोषत नाहीत. त्यामुळे घाम त्वचेवर साचून राहतो आणि घामोळे, खाज तसेच दुर्गंधी यांसारख्या समस्या उद्भवतात.

हे ही वाचा:

इराणी गुप्तचर विभागाचे प्रमुख मेजर जनरल खादेमी यांना इस्रायलने मारले

हिंदूंच्या शोभायात्रेवर हल्ला करणाऱ्यांचे घर जमीनदोस्त, गोरेगावात राडा

अवैध शस्त्र तस्करी प्रकरणी १० ठिकाणी छापे

अमेरिकन वैमानिकाच्या सुटकेसाठी ३६ तासांची मोहीम; इराणमधून कसे काढले बाहेर?

सूती कपडे हलके, मऊ आणि त्वचेसाठी अनुकूल असतात. दैनंदिन वापरासाठी ते अतिशय आरामदायक आहेत. हे कपडे कॅज्युअल किंवा फॉर्मल दोन्ही प्रकारे वापरता येतात. सूती कपड्यांमध्ये पट्टे, चेक्स आणि साधे डिझाईन उपलब्ध असून ते पारंपरिक आणि आधुनिक फॅशनचा उत्तम संगम साधतात.

उन्हाळ्यात कपड्यांइतकाच रंगांचाही विचार महत्त्वाचा असतो. कपड्यांचा रंगही उष्णतेवर परिणाम करतो. पांढरा, फिकट गुलाबी, आकाशी, फिकट पिवळा किंवा क्रीम यांसारखे हलके रंग सूर्यकिरण परावर्तित करतात, त्यामुळे शरीर कमी गरम होते. याउलट काळा, नेव्ही ब्लू किंवा गडद लाल यांसारखे गडद रंग उष्णता अधिक शोषून घेतात आणि शरीर अधिक गरम करतात. त्यामुळे उन्हाळ्यात हलक्या रंगांचे सूती कपडे निवडणे हा सर्वोत्तम पर्याय आहे.