तामिळनाडूचे उपमुख्यमंत्री आणि द्रमुक (DMK) नेते उदयनिधी स्टॅलिन यांनी अभिनेत्री तृषा कृष्णन यांच्याबाबत केलेल्या कथित आक्षेपार्ह वक्तव्यामुळे राज्यातील राजकारण चांगलेच तापले आहे. या प्रकरणी पोलिसांनी उदयनिधी स्टॅलिन यांच्याविरोधात गुन्हा दाखल केला असून, चौकशीसाठी त्यांना ताब्यात घेतल्याची माहिती समोर आली आहे.
वादाची सुरुवात उदयनिधी स्टॅलिन यांनी एका सार्वजनिक कार्यक्रमात केलेल्या वक्तव्यामुळे झाली. त्यांच्या भाषणातील अभिनेत्री तृषा कृष्णन यांच्याविषयीचा उल्लेख महिलांचा अपमान करणारा आणि अश्लील स्वरूपाचा असल्याचा आरोप करण्यात आला. भाषणाचा व्हिडिओ सोशल मीडियावर मोठ्या प्रमाणात व्हायरल झाल्यानंतर विरोधकांनी त्यांच्यावर जोरदार टीका केली. अभिनेता विजय यांच्या TVK पक्षाने या वक्तव्याचा तीव्र निषेध करत पोलिसांकडे औपचारिक तक्रार दाखल केली. या तक्रारीच्या आधारे पोलिसांनी प्राथमिक चौकशी सुरू केली.
माहितीनुसार, पोलिसांनी भारतीय न्याय संहितेच्या (BNS) संबंधित कलमांअंतर्गत उदयनिधी स्टॅलिन यांच्याविरोधात गुन्हा दाखल केला. त्यानंतर चौकशीसाठी त्यांना ताब्यात घेण्यात आले. पोलिसांकडून या प्रकरणातील व्हिडिओ, भाषणाची संपूर्ण ध्वनिचित्रफीत आणि इतर पुराव्यांची तपासणी केली जात आहे.
सोमवारी तंजावरमध्ये झालेल्या डीएमकेच्या सभेनंतर हा वाद निर्माण झाला, जिथे पक्षाच्या कार्यकर्त्यांनी दिलेल्या घोषणांना प्रत्युत्तर देताना उदयनिधी स्टॅलिन यांनी तामिळनाडूचे मुख्यमंत्री सी. जोसेफ विजय यांना लक्ष्य केल्याचा आरोप आहे. आंदोलनादरम्यान, स्टॅलिन यांनी त्रिशा यांच्याबद्दल एक द्व्यर्थी टिप्पणी केली. कावेरी पाणीवाटप वादावरून सुरू झालेले हे आंदोलन लवकरच एक राजकीय मुद्दा बनले.
ही वाचा:
मोदी हे इस्रायलचे सर्वोच्च मित्र!
लग्नाची शेरवानी जाळली; इस्त्रीवाल्याला १४ हजारांचा ‘चटका’
भारतीय ‘धुरंधरां’नी ३० हून अधिक दहशतवादी टिपले
डाबरला मध, तूपासह अनेक उत्पादनांची विक्री थांबवण्याचे आदेश
दरम्यान, द्रमुकने उदयनिधी स्टॅलिन यांच्या समर्थनार्थ भूमिका घेतली आहे. त्यांच्या वक्तव्याचा विपर्यास करण्यात आल्याचा दावा पक्षाने केला असून, राजकीय हेतूने हा वाद निर्माण करण्यात आल्याचा आरोपही करण्यात आला आहे. संपूर्ण भाषणाचा संदर्भ न घेता काही भाग व्हायरल करून दिशाभूल केली जात असल्याचे द्रमुकचे म्हणणे आहे. दुसरीकडे, TVK ने या प्रकरणात कठोर कारवाईची मागणी केली आहे.