आयपीएल २०२६ मध्ये रॉयल चॅलेंजर्स बेंगळुरूने (RCB) चेन्नई सुपर किंग्जवर (CSK) ४३ धावांनी मात करत शानदार विजय मिळवला. एम. चिन्नास्वामी स्टेडियमवर झालेल्या या सामन्यात टिम डेविडने विस्फोटक फलंदाजी करत सामना एकहाती फिरवला.
डेविडने अवघ्या २५ चेंडूत ८ षटकारांच्या मदतीने नाबाद ७० धावा केल्या आणि त्याला ‘प्लेयर ऑफ द मॅच’ पुरस्काराने गौरविण्यात आले.
सामन्यानंतर बोलताना टिम डेविडने आरसीबीचे मेंटॉर आणि फलंदाजी प्रशिक्षक दिनेश कार्तिक यांचे विशेष कौतुक केले.
“दिनेश कार्तिकसोबत काम करणं खूप मौल्यवान आहे. त्यांच्या अनुभवातून आम्हाला खूप काही शिकायला मिळतं. आम्ही मूलभूत गोष्टींवर लक्ष देतो आणि त्यानंतर आपल्या ताकदीप्रमाणे खेळ पुढे नेतो,” असे डेविड म्हणाला.
दिनेश कार्तिक यांच्या मार्गदर्शनाखाली आरसीबीच्या फलंदाजीत मोठा बदल झाल्याचेही दिसून येत आहे. विशेषतः मधल्या आणि खालच्या फळीतल्या फलंदाजांनी आक्रमक खेळ करत संघाला बळ दिले आहे. २०२५ मध्ये मेंटॉर झाल्यानंतर त्याच वर्षी आरसीबीने पहिल्यांदाच आयपीएल किताब जिंकला होता.
डेविडने कर्णधार रजत पाटीदारचाही उल्लेख करत त्याच्या फलंदाजीचे कौतुक केले. “तो उत्कृष्ट लयीत खेळत होता. आम्ही दोघांनी मिळून संघाला मोठ्या धावसंख्येपर्यंत नेण्याचा आनंद घेतला,” असे तो म्हणाला.
आपल्या फलंदाजी क्रमाबद्दल बोलताना डेविड म्हणाला की, संघ त्याला विविध भूमिका देतो यासाठी तो स्वतःला भाग्यवान मानतो. “मी माझ्या शैलीत फारसा बदल करत नाही, पण संघाचा आणि सपोर्ट स्टाफचा विश्वास मला आत्मविश्वास देतो,” असे त्याने सांगितले.
दरम्यान, १०६ मीटरच्या प्रचंड षटकाराबाबत डेविडने हलक्या-फुलक्या शैलीत सांगितले की, सरावादरम्यान संघात छतावर षटकार मारण्याची स्पर्धा होते आणि सामन्यात तसा फटका बसणे हा खूप मजेशीर अनुभव होता.
