अफगाणिस्तानचा स्टार लेगस्पिनर राशिद खान भारताविरुद्ध जूनमध्ये होणाऱ्या एकमेव टेस्ट सामन्यात खेळणार की नाही, याबाबत अनिश्चितता निर्माण झाली आहे. स्वतः राशिदनेच रेड-बॉल क्रिकेटमुळे आपल्या करिअरवर परिणाम होऊ शकतो, अशी भीती व्यक्त केली आहे.
राशिद खानने स्पष्टपणे सांगितले की, टेस्ट क्रिकेट खेळताना त्याच्या पाठीवर ताण येण्याची शक्यता आहे आणि डॉक्टरांनीही त्याला रेड-बॉल क्रिकेटपासून दूर राहण्याचा सल्ला दिला आहे. “मी १०० टेस्ट सामने खेळू शकत नाही. माझ्यासाठी हे फॉरमॅट थोडं कठीण आहे,” असे तो म्हणाला. झिम्बाब्वेविरुद्धच्या सामन्यात ६७ षटके टाकल्यानंतर डॉक्टरही आश्चर्यचकित झाल्याचे त्याने सांगितले.
त्याने पुढे म्हटले की, वनडे क्रिकेट त्याचा मुख्य फोकस आहे आणि तो दीर्घकाळ या फॉरमॅटमध्ये खेळू शकतो. टेस्ट क्रिकेट मर्यादित ठेवणे गरजेचे आहे. “वर्षात एक टेस्ट असेल तर खेळेन, पण त्यापेक्षा जास्त सांभाळणे कठीण आहे,” असेही तो म्हणाला.
राशिदने हेही स्पष्ट केले की, जर तो टेस्ट संघात असेल तर दिवसभर गोलंदाजी करावी लागते, त्यामुळे फिटनेसची विशेष काळजी घेणे आवश्यक आहे. त्याचे लक्ष्य आगामी वनडे विश्वचषक असल्याचेही त्याने सांगितले.
राशिद खानने आतापर्यंत अफगाणिस्तानसाठी १२ टेस्ट सामन्यांपैकी केवळ ६ सामने खेळले आहेत. जानेवारी २०२५ मध्ये झिम्बाब्वेविरुद्ध त्याने शेवटचा टेस्ट सामना खेळला होता. २०२३ वनडे वर्ल्ड कपनंतर झालेल्या पाठीच्या शस्त्रक्रियेमुळे त्याची रेड-बॉल क्रिकेटमधील उपस्थिती मर्यादित झाली आहे.
आयपीएल २०२६ संपल्यानंतर भारत आणि अफगाणिस्तान यांच्यात ६ ते १० जूनदरम्यान न्यू चंदीगड येथे एकमेव टेस्ट सामना होणार आहे. मात्र या सामन्यात राशिद खान खेळणार का, याबाबत आता मोठा प्रश्नचिन्ह निर्माण झाला आहे.
दरम्यान, आयपीएल २०२६ मध्ये गुजरात टायटन्सकडून खेळताना राशिद खान उत्कृष्ट फॉर्ममध्ये दिसत आहे. दिल्लीविरुद्धच्या सामन्यात त्याने प्रभावी गोलंदाजी करत संघाच्या विजयात महत्त्वाची भूमिका बजावली होती.
