भारत आणि इंग्लंड यांच्यातील तिसरा एकदिवसीय सामना रविवारी क्रिकेटची पंढरी मानल्या जाणाऱ्या लॉर्ड्स मैदानावर खेळवला जाणार आहे. या सामन्यात भारतीय कर्णधार रोहित शर्मा याच्या कामगिरीकडे सर्वांचे लक्ष लागले आहे. मात्र, लॉर्ड्सवरील त्याची एकदिवसीय कामगिरी फारशी प्रभावी राहिलेली नाही.
रोहितने लॉर्ड्सवर आतापर्यंत फक्त दोन वनडे सामने खेळले असून, एका सामन्यात तो शून्यावर बाद झाला होता, तर दुसऱ्या सामन्यात त्याने १५ धावा केल्या होत्या. तिन्ही प्रकारच्या क्रिकेटचा विचार केल्यास त्याने या मैदानावर पाच सामने खेळून २२ च्या सरासरीने १३३ धावा केल्या आहेत.
या मालिकेतील पहिल्या दोन सामन्यांतही रोहितला मोठी खेळी करता आलेली नाही. पहिल्या वनडेत तो ११ धावांवर, तर दुसऱ्या सामन्यात ४७ चेंडूत २६ धावा करून बाद झाला. त्यामुळे त्याच्या फॉर्मबाबत आणि भवितव्याबाबत विविध चर्चा सुरू झाल्या होत्या.
काही माध्यमांनी तर लॉर्ड्सवरील सामना हा रोहितच्या कारकिर्दीतील अखेरचा वनडे ठरू शकतो, असा दावाही केला होता. मात्र, या सर्व अफवांना बीसीसीआयचे सचिव देवजीत सैकिया यांनी पूर्णविराम दिला आहे.
‘आयएएनएस’शी बोलताना सैकिया म्हणाले, “रोहित शर्माच्या भवितव्याबाबत सुरू असलेल्या चर्चा निराधार आहेत. बोर्ड स्तरावर अशा कोणत्याही निर्णयावर चर्चा झालेली नाही. लॉर्ड्समधील सामना त्याचा अखेरचा वनडे असेल, या दाव्यात कोणतेही तथ्य नाही.”
मालिकेत भारताला विजयासाठी कर्णधाराकडून मोठ्या खेळीची अपेक्षा आहे. लॉर्ड्सवरील खराब विक्रम मागे टाकत रोहित दमदार खेळी करतो का, याकडे क्रिकेटप्रेमींचे लक्ष लागले आहे.