पाकिस्तान हॉकी संघासाठी चर्चेचा ठरलेल्या ऑस्ट्रेलियाच्या दौऱ्यावरून परतल्यानंतर संघाचा कर्णधार शकील अम्मद बटने राष्ट्रीय महासंघावर टीका केली आहे. तो म्हणाला की, केवळ हॉटेल बुकिंगअभावी त्यांच्या संघाला रस्त्यावर भटकावे लागले नाही तर सामने खेळण्यासाठी जाण्यापूर्वी भांडीही धुवावी लागली. बटने बुधवारी सकाळी लाहोर विमानतळावर पत्रकारांना सांगितले की पाकिस्तान हॉकी फेडरेशन (पीएचएफ) त्यांच्याशी खोटे बोलत आहे आणि आता सर्व काही संपले आहे.
“आम्ही फेडरेशनच्या सध्याच्या व्यवस्थापनाखाली खेळणे सुरू ठेवू शकत नाही. जेव्हा खेळाडूंना सामने खेळण्यासाठी जाण्यापूर्वी स्वयंपाकघर स्वच्छ करावे लागते आणि भांडी धुवावी लागतात तेव्हा तुम्ही आमच्याकडून चांगल्या निकालांची अपेक्षा कशी करू शकता,” असा सवाल कर्णधार बट याने उपस्थित केला. सरकारी मालकीच्या पाकिस्तान क्रीडा मंडळाने (PSB) ऑस्ट्रेलियातील राष्ट्रीय संघाच्या हॉटेल निवासासाठी पाकिस्तान हॉकी फेडरेशनला १० दशलक्ष पाकिस्तानी रुपयांपेक्षा जास्त रक्कम दिल्याची पुष्टी केल्यानंतर पाकिस्तान हॉकी फेडरेशनवर तीव्र टीका झाली आहे.
पाकिस्तान हॉकी संघाला कॅनबेराला जाणाऱ्या त्यांच्या पुढच्या विमानात चढण्यापूर्वी सिडनी विमानतळावर १३-१४ तास वाट पाहावी लागली. एफआयएच प्रो लीग सामन्यांपूर्वी संघ त्यांच्या हॉटेलमध्ये पोहोचला तेव्हा आणखी त्रासदायक बातमी समोर आली. खेळाडूंना सांगण्यात आले की, त्यांनी कोणतेही बुकिंग केलेले नाही कारण हॉटेलला कोणतेही आगाऊ पैसे दिले गेले नाहीत.
खेळाडूंना हॉटेल शोधण्यासाठी तासन्तास वाट पाहावी लागली आणि रस्त्यावर भटकावे लागले. दुसऱ्या दिवशी दुपारी त्यांचा पहिला सामना ऑस्ट्रेलियाविरुद्ध खेळायचा होता, ज्यात संघाला २-३ असा पराभव पत्करावा लागला. ऑस्ट्रेलिया दौऱ्यादरम्यान, पाकिस्तानने यजमान संघासोबतच जर्मनीविरुद्धही सामने खेळले, परंतु ते सर्व गमावले. “सर्वात दुःखद गोष्ट म्हणजे हॉटेल फक्त १० दिवसांसाठी बुक केले, तर आम्हाला १३ दिवसांसाठी राहायचे होते. १० दिवसांनंतर, आम्हाला स्वस्त हॉटेलमध्ये राहावे लागले,” असे बट म्हणाला. बट याने खुलासा केला की पीएचएफने खेळाडूंना इशारा दिला होता की, जर ते माध्यमांशी बोलले तर त्यांच्यावर शिस्तभंगाची कारवाई केली जाईल.
हे ही वाचा:
एआय समिटमध्ये गुगलचे सीईओ सुंदर पिचाई भेटले मोदींना
एआय समिटमध्ये चीनी रोबोडॉग स्वतःच विकसित केल्याचा दावा
राज्यसभेच्या निवडणुकीची घोषणा; मविआचा एक तरी खासदार निवडून येईल?
एआय समिटमधून चोरीला गेलेले स्टार्टअप डिव्हाइस २४ तासांत सापडले
पाकिस्तान क्रीडा मंडळचे महासंचालक नूर उस सबाह यांनी माध्यमांना सांगितले की, पाकिस्तान हॉकी फेडरेशनचे मुख्य संरक्षक असलेले पंतप्रधान शाहबाज शरीफ यांनी या प्रकरणाची चौकशी करण्याचे आदेश दिले आहेत आणि ते सविस्तर अहवाल तयार करत आहेत.
