महिला प्रीमियर लीग २०२६ मध्ये दिल्ली कॅपिटल्स आणि गुजरात जायंट्स यांच्यात नवी मुंबईत खेळल्या गेलेल्या सामन्यात दिल्लीला पराभव पत्करावा लागला असला, तरी दिल्लीची वेगवान गोलंदाज नंदनी शर्मा हिने आपल्या अफलातून कामगिरीने सर्वांचे लक्ष वेधून घेतले. नंदनीने हॅट्रिकसह पाच बळी घेत महिला प्रीमियर लीगमध्ये नवा इतिहास रचला.
२० सप्टेंबर २००१ रोजी चंदीगड येथे जन्मलेल्या नंदनी शर्माला दिल्ली कॅपिटल्सने लिलावात २० लाख रुपयांना आपल्या संघात सामील करून घेतले होते. संघाने दाखवलेल्या विश्वासाला तिने पूर्णपणे न्याय दिला. गुजरात जायंट्सविरुद्धच्या सामन्यात दिल्लीचे बहुतांश गोलंदाज प्रभावहीन ठरत असताना, नंदनीने आपल्या वेगवान आणि अचूक माऱ्याने गुजरातच्या फलंदाजांना अडचणीत टाकले.
नंदनीने ४ षटकांत ३३ धावा देत ५ महत्त्वाचे बळी घेतले. तिने ९५ धावांवर धडाकेबाज खेळी करत असलेल्या सोफी डिवाइनला बाद करत गुजरातला मोठा धक्का दिला. त्यानंतर शेवटच्या षटकात तिने सामन्याचा रंगच बदलून टाकला. अखेरच्या षटकात नंदनीने चार बळी टिपले, ज्यात तिची संस्मरणीय हॅट्रिकही समाविष्ट होती.
या हॅट्रिकमध्ये प्रथम कनिका आहूजाला स्टंपआउट केले, पुढील चेंडूवर राजेश्वरी गायकवाडला क्लीन बोल्ड केले आणि अखेरच्या चेंडूवर रेणुका ठाकूरचे स्टंप्स उडवत नंदनीने प्रेक्षकांना थक्क केले.
महिला प्रीमियर लीगच्या इतिहासात हॅट्रिक घेणारी नंदनी शर्मा ही दुसरी भारतीय गोलंदाज ठरली आहे. यापूर्वी ही कामगिरी दीप्ती शर्मा हिने केली होती. तसेच इंग्लंडची इसी वोंग आणि ऑस्ट्रेलियाची ग्रेस हॅरिस यांनीही महिला प्रीमियर लीगमध्ये हॅट्रिकची कामगिरी नोंदवली आहे.
नंदनी शर्माने जर अशीच सातत्यपूर्ण कामगिरी कायम राखली, तर लवकरच तिला भारतीय महिला क्रिकेट संघाची जर्सी घालण्याची संधी मिळू शकते, असा विश्वास क्रिकेट तज्ज्ञांकडून व्यक्त केला जात आहे.