भारताला कॉमनवेल्थ गेम्स २०३० ची मेजबानी मिळाली असून, तब्बल २० वर्षांनंतर देश पुन्हा एकदा या प्रतिष्ठित स्पर्धेचा यजमान बनणार आहे. क्रीडा मंत्री डॉ. मनसुख मांडविया यांनी ही घोषणा ऐतिहासिक ठरवताना सांगितले की, “पंतप्रधान नरेंद्र मोदी यांच्या नेतृत्वात भारताचा स्पोर्ट्स सेक्टर झपाट्याने बदलत आहे.”
स्कॉटलंडच्या ग्लासगोमध्ये झालेल्या कॉमनवेल्थ स्पोर्ट्स जनरल असेंब्लीमध्ये अहमदाबाद शहराला यजमानपद देण्यास हिरवा कंदील देण्यात आला. या घोषणेनंतर नवी दिल्लीतील मेजर ध्यानचंद नॅशनल स्टेडियममध्ये जोरदार जल्लोष साजरा करण्यात आला.
युथ अफेअर्स अँड स्पोर्ट्स मंत्रालयाने राजधानीत खास कार्यक्रम आयोजित केला होता. त्यात क्रीडा मंत्री डॉ. मांडविया, IOA चे वरिष्ठ प्रतिनिधी, स्पोर्ट्स सेक्रेटरी, MYAS आणि SAI चे अधिकारी उपस्थित होते. अनेक ऑलिम्पियन, कॉमनवेल्थ मेडलिस्ट आणि दिग्गज खेळाडूही उपस्थित होते.
डॉ. मांडविया म्हणाले,
“२०३० हे कॉमनवेल्थ गेम्सचे १०० वे वर्ष. अशा ऐतिहासिक वर्षात यजमान होणे मोठा सन्मान आहे. बॉक्सिंग वर्ल्ड कप, हॉकी वर्ल्ड कप, वर्ल्ड पॅरा अॅथलेटिक्ससह अनेक मोठ्या स्पर्धांची मेजबानी करून भारत जगातील टॉप आंतरराष्ट्रीय स्पर्धांचे आयोजन करण्यास सज्ज असल्याचे सिद्ध झाले आहे.”
ते पुढे म्हणाले,
“आम्ही २०२९ वर्ल्ड पोलिस गेम्सची तयारीही करत आहोत. ही सर्व पावले २०३६ ऑलिम्पिकच्या तयारीसाठी महत्त्वाची आहेत. खेळो इंडिया धोरण आणि स्पोर्ट्स गव्हर्नन्स अॅक्ट भारतात मोठा बदल घडवतील. पुढील १० वर्षांत भारत टॉप १०, तर २०४७ पर्यंत टॉप ५ मध्ये असेल.”
दरम्यान, ICC अध्यक्ष जय शाह यांनीही सोशल मीडियावर प्रतिक्रिया देत म्हटले:
“अहमदाबादला २०३० सेंटेनरी कॉमनवेल्थ गेम्सची मेजबानी मिळणे हा भारतासाठी अभिमानाचा क्षण आहे. हे स्पोर्ट्स इकोसिस्टम मजबूत करण्याच्या भारताच्या क्षमतेचे प्रतीक आहे.”
भारताने २०१० नवी दिल्ली CWGमध्ये ३८ सुवर्णांसह १०१ पदके जिंकली होती. त्यात एकट्या शूटिंगमधून ३० पदके आली. २०२२ बर्मिंगहॅममध्ये भारताने २२ सुवर्णांसह ६१ पदके पटकावली होती. त्या आवृत्तीत शूटिंगचा समावेश नव्हता.
अहमदाबाद हे कॉमनवेल्थ गेम्सची मेजबानी करणारे दुसरे भारतीय आणि तिसरे आशियाई शहर ठरले आहे.
