आफ्रिकन देश मालीमध्ये तीन भारतीय नागरिकांचे अपहरण झाल्याचे वृत्त आहे. भारतीय नागरिकांच्या अपहरणाबद्दल भारताने तीव्र चिंता व्यक्त केली आहे. मालीमध्ये दहशतवादी हल्ले वाढत आहेत. परराष्ट्र मंत्रालयाने (MEA) म्हटले आहे की, हे भारतीय नागरिक कायेसमधील डायमंड सिमेंट कारखान्यात काम करत होते. १ जुलै रोजी कारखान्यावर हल्ला झाला होता. या हल्ल्यात त्यांना ओलीस ठेवण्यात आले. भारताने माली सरकारला त्यांची सुरक्षित सुटका करण्यासाठी आवश्यक पावले उचलण्यास सांगितले आहे.
परराष्ट्र मंत्रालयाच्या म्हणण्यानुसार, १ जुलै रोजी काही सशस्त्र लोकांनी मालीमधील एका कारखान्यावर हल्ला केला. त्यांनी तीन भारतीय नागरिकांना ओलीस ठेवले. अद्याप कोणत्याही संघटनेने अपहरणाची जबाबदारी स्वीकारलेली नाही. परंतु, अल-कायदाशी संबंधित जेएनआयएमने एकाच दिवशी मालीमध्ये झालेल्या अनेक हल्ल्यांची जबाबदारी स्वीकारली आहे.