बेटिंग अ‍ॅप्सच्या प्रमोशनप्रकरणी अभिनेता विजय देवरकोंडा ईडीसमोर

अभिनेता विजय देवरकोंडा बेटिंग अ‍ॅप्सच्या प्रमोशनप्रकरणी सुरू असलेल्या चौकशीत बुधवार (६ ऑगस्ट) रोजी सकाळी सुमारे ११ वाजता हैदराबादमधील बशीरबाग येथील अंमलबजावणी संचालनालयाच्या (ईडी) कार्यालयात हजर झाले. ईडी त्यांच्याकडून बेटिंग अ‍ॅप्ससोबत झालेल्या करारासंबंधी तसेच त्यासाठी मिळालेल्या मोबदल्याबाबत चौकशी करू शकते. या प्रकरणात ईडीसमोर हजर होणारे विजय हे दुसरे अभिनेते आहेत. यापूर्वी, ३० जुलै रोजी अभिनेते प्रकाश राज यांची पाच तास चौकशी झाली होती.

प्रकाश राज यांनी सांगितले की, त्यांनी २०१६ मध्ये एका बेटिंग अ‍ॅपसाठी जाहिरात केली होती, मात्र त्यासाठी कोणताही मोबदला घेतलेला नव्हता. त्यांनी हे देखील स्पष्ट केलं की त्यानंतर त्यांना जाणवलं की अशा प्रकारचं प्रमोशन करणं योग्य नव्हतं. ईडीने अलीकडेच अभिनेता राणा दग्गुबाती, प्रकाश राज, विजय देवरकोंडा आणि लक्ष्मी मांचू यांना समन्स बजावले होते.

हेही वाचा..

टॅरिफ धमकीवरील भारताच्या प्रतिक्रियेवर अमेरिकेची चुप्पी

पंतप्रधान मोदींना राखी बांधणारी पाकिस्तानी वंशाची महिला कोण?

आता क्रिकेटपटूंना त्यांच्या इच्छेनुसार सामने निवडता येणार नाहीत?

अमेरिकेच्या रशियन तेलावरील धमकीच्या पार्श्वभूमीवर अजित डोभाल मॉस्कोमध्ये!

राणा दग्गुबाती यांना २३ जुलै रोजी चौकशीसाठी हजर होण्यास सांगण्यात आले होते, परंतु त्यांनी नवीन तारीख मागितली. त्यानंतर त्यांना ११ ऑगस्ट रोजी ईडीसमोर हजर होण्याचे नवे नोटिस दिले गेले. लक्ष्मी मांचू यांना १३ ऑगस्ट रोजी चौकशीसाठी बोलावण्यात आले आहे. ईडीने १० जुलै रोजी २९ नामवंत व्यक्तींच्या विरोधात, ज्यामध्ये अभिनेते, सोशल मीडियावर प्रभाव टाकणारे इन्फ्लुएन्सर्स आणि यूट्यूबर्स यांचा समावेश आहे, अशा अवैध बेटिंग अ‍ॅप्सच्या प्रमोशनप्रकरणी कारवाई केली. ही कारवाई पब्लिक गॅम्बलिंग अ‍ॅक्ट, १८६७ च्या उल्लंघनावर आणि मनी लॉन्ड्रिंगची शक्यता लक्षात घेऊन सुरू करण्यात आली. ही चौकशी मनी लॉन्ड्रिंग प्रतिबंधक कायद्यांतर्गत (PMLA) चालू आहे आणि ती तेलंगणा व आंध्र प्रदेशमध्ये दाखल झालेल्या पाच एफआयआरवर आधारित आहे.

या प्रकरणात विजय देवरकोंडा, राणा दग्गुबाती, प्रकाश राज, निधी अग्रवाल, प्रणिता सुभाष, लक्ष्मी मांचू, अनन्या नगेला, तसेच टीव्ही कलाकार श्रीमुखी, श्यामला, वर्षिणी सौंदर्यजन, वसंत कृष्णन, शोभा शेट्टी, अमृता चौधरी, नयनी पावनी, नेहा पठान, पांडु, पद्मावती, हर्षा साई आणि बय्या सनी यादव यांची नावे देखील समाविष्ट आहेत. या सर्वांपैकी बहुतेकांच्या विरोधात हैदराबाद व सायबराबाद पोलिसांनी आधीच गुन्हे दाखल केले आहेत.

मार्च २०२५ मध्ये सायबराबाद पोलिसांनी विजय देवरकोंडा, राणा दग्गुबाती, प्रकाश राज आणि इतरांविरुद्ध बेटिंग अ‍ॅप्सच्या प्रमोशनप्रकरणी एफआयआर दाखल केला होता. विजय आणि राणा यांनी सांगितले होते की त्यांनी केवळ कायदेशीररीत्या परवानगी असलेल्या ऑनलाइन कौशल्याधिष्ठित (skill-based) गेम्सचा प्रचार केला होता.