नैऋत्य दिल्लीतील बिजवासन येथे गुरुवारी सायबर फसवणूक-संबंधित मनी लाँडरिंग प्रकरणात छापे टाकताना अंमलबजावणी संचालनालयाच्या (ईडी) पथकावर हल्ला झाल्याची घटना घडली असून यात एका अधिकाऱ्याला किरकोळ दुखापत झाली आहे. केंद्रीय तपास एजन्सीने UAE-आधारित Pyypl पेमेंट एग्रीगेटरशी जोडलेल्या सायबर ॲप फसवणुकीशी संबंधित प्रकरणाच्या संदर्भात एफआयआर नोंदवला होता.
अशोक शर्मा आणि त्यांच्या भावासह या प्रकरणातील आरोपींनी ईडी टीमवर हल्ला केला. याबद्दल एफआयआर दाखल करण्यात आला असून परिस्थिती नियंत्रणात असल्याचे ईडीच्या सूत्रांनी सांगितले. या हल्ल्यात एक अंमलबजावणी अधिकारी किरकोळ जखमी झाला आहे. त्याच्यावर प्राथमिक उपचार केल्यानंतर छापेमारी सुरू असल्याचे अधिकाऱ्यांनी सांगितले.
हेही वाचा..
व्यवसायाबाबत बोला; काश्मीर मुद्द्यावर बोलण्यासाठी आलेलो नाही!
ईडीच्या सूत्रांनी दिलेल्या माहितीनुसार, देशभरात फिशिंग घोटाळे, क्यूआर कोडची फसवणूक आणि अर्धवेळ नोकरीचे घोटाळे यासारखे हजारो सायबर गुन्हे नोंदवले गेले आहेत. i4C आणि फायनान्शियल इंटेलिजेंस युनिट – इंडिया (FIU-IND) च्या मदतीने, नोंदवलेल्या हजारो गुन्ह्यांचे संपूर्ण विश्लेषण केले गेले. हे अवैध पैसे १५,००० खात्यांमध्ये जमा केल्याचे आढळून आले, ते पुढे म्हणाले.
डेबिट आणि क्रेडिट कार्डे मिळवली गेली आणि ही कार्डे वापरून Pyypl वर टॉप-अप व्हर्च्युअल खात्यांमध्ये पैसे पाठवले गेले. इडीच्या सूत्रांनी सांगितले की, Pyypl कडून क्रिप्टोकरन्सी खरेदी करण्यासाठी निधी वापरण्यात आला. संपूर्ण नेटवर्क संदिग्ध चार्टर्ड अकाउंटंट्सद्वारे चालवले जात होते आणि अद्याप शोध सुरू असल्याचे सांगण्यात आले.
