वरळीच्या जेट्टीवर आता उतरणार हेलिकॉप्टर्स

मुंबई महानगरपालिकेने (BMC) वरळी जेट्टीवर अत्याधुनिक हेलिपॅड उभारण्याचा निर्णय घेतला असून, त्यासाठी निविदा प्रक्रिया सुरू करण्यात आली आहे. हा प्रकल्प पब्लिक–प्रायव्हेट पार्टनरशिप (PPP) मॉडेलवर राबवला जाणार असून, यामध्ये खासगी कंपनी आणि बीएमसी संयुक्तपणे काम करणार आहेत. या निर्णयामुळे मुंबईतील आपत्कालीन सेवा, प्रशासकीय कामकाज आणि विशेष प्रवासासाठी हवाई सुविधा अधिक सक्षम होण्याची अपेक्षा आहे.

या प्रस्तावित हेलिपॅडचा प्रमुख वापर आपत्कालीन वैद्यकीय सेवा (एअर अ‍ॅम्ब्युलन्स), आपत्ती व्यवस्थापन, सुरक्षा व निरीक्षण मोहिमा, तसेच व्हीआयपी आणि व्हीव्हीआयपी हालचालींसाठी केला जाणार आहे. सध्या मुंबईतील रस्ते वाहतुकीवरील ताण, प्रचंड गर्दी आणि वेळेचा अपव्यय लक्षात घेता, शहराच्या मध्यवर्ती भागात अशी हवाई सुविधा उपलब्ध होणे अत्यंत महत्त्वाचे मानले जात आहे. समुद्रकिनाऱ्यालगत असलेले वरळी जेट्टीचे स्थान हेलिकॉप्टरच्या सुरक्षित आणि सुलभ ये-जा साठी अनुकूल ठरणार आहे.
हे ही वाचा:
मुंबईत पोलिसांच्या वेशात केनियन महिलेची केली ६६ लाखांची लूट

अँड्रॉइड ऍप ‘विंगो’ घोटाळा; फसवणूक करणारे ऍप, टेलिग्राम चॅनेल ब्लॉक

निविदा अटींनुसार, निवडली जाणारी खासगी कंपनी हेलिपॅडची संपूर्ण रचना, बांधकाम, देखभाल आणि दैनंदिन संचालन करणार आहे. यामध्ये हेलिकॉप्टर लँडिंग व टेक-ऑफसाठी आवश्यक क्षेत्र, सुरक्षेसाठी संरक्षक भिंती, अग्निशमन यंत्रणा, रात्रीच्या वेळी वापरासाठी प्रकाश व्यवस्था, तसेच नेव्हिगेशनसाठी अत्याधुनिक उपकरणांचा समावेश असणार आहे. सर्व कामे नागरी उड्डयन नियम व मार्गदर्शक तत्त्वांनुसार आणि आवश्यक परवानग्यांसह पूर्ण करणे बंधनकारक असेल.

पीपीपी मॉडेलनुसार, संबंधित कंपनी बीएमसीला दरमहा निश्चित शुल्क अदा करेल. त्याचबरोबर, हेलिकॉप्टर लँडिंग आणि टेक-ऑफमधून मिळणाऱ्या उत्पन्नातील ठरावीक हिस्सा महानगरपालिकेला देण्यात येणार आहे. त्यामुळे बीएमसीला नियमित महसूल मिळणार असून, खासगी भागीदारालाही दीर्घकालीन व्यवसायाची संधी उपलब्ध होणार आहे. हा करार सुरुवातीला १५ वर्षांसाठी असणार असून, कामगिरी समाधानकारक ठरल्यास तो पुढे वाढवण्याची तरतूद करण्यात आली आहे.

याशिवाय, या प्रकल्पाचा एक महत्त्वाचा भाग म्हणून वरळी जेट्टी परिसराचे सौंदर्यीकरण करण्यात येणार आहे. जेट्टी अधिक स्वच्छ, सुरक्षित आणि नागरिकांसाठी आकर्षक बनवण्यावर भर दिला जाणार आहे. यापूर्वी करण्यात आलेल्या तांत्रिक तपासणीत जेट्टीची रचनात्मक स्थिरता योग्य असल्याचे स्पष्ट झाल्याने या महत्त्वाकांक्षी प्रकल्पाला वेग मिळाला आहे.