चाणक्य डिफेन्स डायलॉग : राष्ट्रपती द्रौपदी मुर्मू मुख्य अतिथी म्हणून सहभागी

भारतीय सेनेचा अत्यंत महत्त्वाचा संवाद ‘चाणक्य डिफेन्स डायलॉग’ सुरू होत आहे. गुरुवारी राष्ट्रपती द्रौपदी मुर्मू या चाणक्य डिफेन्स डायलॉगमध्ये मुख्य अतिथी म्हणून सहभागी होतील. यावेळी सेना प्रमुख जनरल उपेंद्र द्विवेदी, सर्वोच्च सेना अधिकारी, नीती आयोगाचे सीईओ, संरक्षण सचिव यांसह देश-विदेशातील अनेक संरक्षण तज्ज्ञ व मान्यवर उपस्थित राहतील. या वर्षीच्या ‘चाणक्य डिफेन्स डायलॉग’चा मुख्य विषय आहे. “रिफॉर्म टू ट्रान्सफॉर्म – सशक्त, सुरक्षित आणि विकसित भारत”. हा कार्यक्रम २७ व २८ नोव्हेंबरला आयोजित करण्यात येणार असून, ‘ऑपरेशन सिंदूर’वरही विशेष चर्चा होईल.

‘चाणक्य डिफेन्स डायलॉग २०२५ मध्ये राष्ट्रीय सुरक्षा, आत्मनिर्भर भारत आणि भविष्यातील युद्धतंत्र यावर विशेष सत्रे आयोजित केली जातील. भारताची सुरक्षा क्षमता, दहशतवादाविरुद्ध रणनीतिक पावले, भविष्यातील संघर्षांची रूपरेषा आणि वर्ष २०४७ पर्यंत विकसित भारताच्या निर्मितीसाठी करण्यात येणाऱ्या प्रयत्नांवर तज्ज्ञांकडून सखोल चर्चा केली जाईल. येथे ‘ऑपरेशन सिंदूर’ आणि ‘संपूर्ण रणनीतिक विजय’ याविषयीही विचार विनिमय केला जाईल. विशेष सत्रामध्ये भारताची धोरणात्मक क्षमता व दहशतवादाविरुद्धच्या निर्णायक उपाययोजनांवर चर्चा होईल. जागतिक दहशतवादाचा बदलता स्वरूप, तणावाच्या परिस्थितीत रणनीतिक आघाडी टिकवणे आणि दक्षिण आशियात दहशतवाद रोखण्यासाठी नवीन रणनीती अशा मुद्द्यांवर मंथन केले जाईल. तसेच आंतरराष्ट्रीय नियमाधारित व्यवस्थेचे बदलते स्वरूप आणि भारताची जागतिक स्तरावरील वाढती सामरिक भूमिका यावरही विचार होईल.

हेही वाचा..

राष्ट्रवादी काँग्रेसने ओडिशा प्रदेशाध्यक्षांना हाकलले

रेअर अर्थ परमनंट मॅग्नेट उत्पादनाला ७,२८० कोटींची मंजुरी

गोडसेंच्या अस्थिच्या विसर्जनाचा मुहूर्त जवळ आलाय?

अबब ! एलपीजीचा खप ४४ टक्क्यांनी वाढला

संरक्षण सचिव राजेश कुमार सिंह राष्ट्रीय सुरक्षेसाठी सुरू असलेल्या नवनवीन संरक्षण सुधारणांची माहिती देतील. त्यांचे भाषण सेनेचे आधुनिकीकरण, संरक्षण संरचनेतील सुधारणा आणि स्वदेशी संरक्षण क्षमतांमध्ये वाढ यावर केंद्रित असेल. भविष्यातील आव्हानांना सामोरे जाण्यासाठी संरक्षण यंत्रणा अधिक मजबूत करण्यावरही चर्चा होणार आहे. या चर्चांचे मुख्य मुद्दे : भविष्यातील युद्धांचे बदलते स्वरूप, सैन्य परिवर्तन आणि स्वदेशीकरणाद्वारे भारत अधिक सशक्त करणे असे असतील. वर्ष २०४७ पर्यंत मजबूत राष्ट्रीय सुरक्षा आराखडा, नागरिक-सैनिक सहकार्य व तंत्रज्ञानआधारित युद्धतंत्रातील नव्या आव्हानांवर विचार केला जाईल.

‘चाणक्य डिफेन्स डायलॉग २०२५’ हे भारताच्या सुरक्षाविषयक धोरण, स्वदेशी तंत्रज्ञान, संरक्षण सुधारणा व भावी रणनीतीवर व्यापक मंथनाचे निर्णायक व्यासपीठ ठरेल आणि सशक्त व सुरक्षित भारताच्या निर्मितीत महत्त्वाची भूमिका बजावेल, असा भारतीय सेनेचा विश्वास आहे. हा डायलॉग दर्शवितो की व्यापक सुधारणा केल्याशिवाय भविष्याची संरक्षण रचना अधिक सक्षम, आधुनिक आणि भक्कम होऊ शकत नाही. भारतीय सेनेच्या स्ट्रॅटेजिक प्लानिंग डायरेक्टरेट आणि सेंटर फॉर लँड वॉरफेअर स्टडीज यांच्या वतीने आयोजित चाणक्य डिफेन्स डायलॉग २०२५ चे हे तिसरे संस्करण आहे. मुख्य कार्यक्रम २७ व २८ नोव्हेंबर रोजी नवी दिल्ली येथे पार पडणार आहे. हे वार्षिक व्यासपीठ राष्ट्रीय सुरक्षा धोरण आणि भावी सैनिकी क्षमतांवरील उच्चस्तरीय चर्चेचे प्रमुख केंद्र बनले आहे.