दिल्ली पोलिसांच्या क्राईम ब्रँचच्या इंटर-स्टेट सेलने (ISC) आंतरराज्यीय अंमली पदार्थ तस्करीविरुद्ध मोठे यश मिळवले आहे. बरेली येथे कार्यरत असलेल्या एका ड्रग सिंडिकेटचा भंडाफोड करत सुमारे दोन किलो उच्च प्रतीची स्मॅक, रोख रक्कम आणि मौल्यवान धातू जप्त करण्यात आले आहेत. ड्रग्ज रॅकेटबद्दल माहिती मिळाल्यानंतर हे ऑपरेशन हाती घेण्यात आले.
पोलिसांनी रविवारी दिलेल्या माहितीनुसार, १५ सप्टेंबरला मिळालेल्या गुप्त माहितीनंतर पोलिसांनी उत्तर प्रदेशातील बरेली येथील रहिवासी अमन खान याला दिल्लीतील आनंद विहार बस टर्मिनलवरून अटक केली. अमनकडून २१४.५ ग्रॅम स्मॅक जप्त करण्यात आले. त्यानंतर एनडीपीएस कायद्यानुसार गुन्हा नोंदवण्यात आला. चौकशीत अमनने कबूल केले की त्याचा दिल्लीचा प्रवास उवैस खान याने आयोजित केला होता. मिळालेल्या माहितीनुसार, १८ सप्टेंबर रोजी बरेलीमध्ये स्थानिक पोलिसांसोबत संयुक्त छापा मारण्यात आला आणि बरेलीच्या मीरगंज ठाण्याखालील गुगाई गावातील घरातून खानला अटक करण्यात आली.
हेही वाचा..
विरोधी पक्षनेता म्हणून राहुल गांधी अपयशी
जनतेच्या पैशातून ‘आप’मदत कोष भरतोय
सुप्रिया सुळे आर्थिक आरक्षणाच्या बाजूने, मुलाखतीत केले वक्तव्य
भारत आणि अमेरिका सैन्याचा युद्धाभ्यास
पोलिसांच्या माहितीनुसार, खानच्या कबुलीनंतर १.७६ किलो स्मॅक, १०.३० लाख रुपये रोख, ४३५ ग्रॅम सोने आणि ५५० ग्रॅम चांदी जप्त करण्यात आली. खानचा जुना गुन्हेगारी इतिहास आहे. २०२२ मध्ये तो उत्तराखंडमधील हरिद्वारच्या श्यामपूर पोलिस ठाण्यात नोंद असलेल्या एका एनडीपीएस प्रकरणात सामील होता. या रॅकेटला पकडणाऱ्या टीममध्ये इन्स्पेक्टर सतेंद्र खारी, सब-इन्स्पेक्टर अमित कुमार, एसआय संजय, हेड कॉन्स्टेबल सानोज, हेड कॉन्स्टेबल ललित, हेड कॉन्स्टेबल बृजेश आणि हेड कॉन्स्टेबल सुरेंद्र यांचा समावेश होता. ही टीम एसीपी रमेश लंबा यांच्या देखरेखीखाली कार्यरत होती, असे डीसीपी आदित्य गौतम यांच्या कार्यालयाने दिलेल्या निवेदनात म्हटले आहे. पोलिसांच्या म्हणण्यानुसार, या टोळीतील इतर सदस्यांना पकडण्यासाठी छापेमारी सुरू आहे.
