पश्चिम बंगालच्या मुख्यमंत्री ममता बॅनर्जी यांनी बंगाल जळल्यास इतर राज्ये आणि दिल्लीही जाळून टाकू, असा इशारा देऊन आणखी एका वादाला तोंड फोडले आहे. पश्चिम बंगालमधील अशांततेचे राज्याबाहेर दूरगामी परिणाम होऊ शकतात, असा दावा करताना त्यांनी ही वादग्रस्त टिप्पणी केली. यावर आसामचे मुख्यमंत्री हिमंता बिस्व सरमा यांनी जोरदार टीका केली आहे. ही भाषा त्यांच्या पदाला शोभत नाही. त्यांनी देश पेटवण्याचा प्रयत्न करू नये, असा इशारा त्यांनी दिला आहे.
सरमा म्हणाले, दीदी, तुमची आसामला धमकी देण्याची हिम्मत कशी झाली ? आम्हाला लाल डोळे दाखवू नका. तुमच्या अपयशाचे राजकारण करून भारताला जाळण्याचा प्रयत्नही करू नका. फूट पाडणारी भाषा बोलणे तुम्हाला शोभत नाही.
ममता बॅनर्जी यांनी तृणमूल काँग्रेसच्या विद्यार्थी संघटनेच्या स्थापना दिनानिमित्त आयोजित केलेल्या सार्वजनिक कार्यक्रमाला संबोधित केल्यानंतर नुकताच हा वाद निर्माण झाला. आपल्या भाषणादरम्यान, बॅनर्जी यांनी इशारा दिला की बंगालमधील अशांततेचे राज्याबाहेर दूरगामी परिणाम होऊ शकतात.
हेही वाचा..
शेख हसीना यांच्या पक्षाच्या नेत्याचा कुजलेला मृतदेह मेघालयात सापडला
जम्मू काश्मीरमधील दोन चकमकींमध्ये तीन दहशतवाद्यांचा खात्मा
गुजरातमध्ये पावसाचा हाहाःकार; पूरग्रस्त भागातून १७,८०० लोकांना सुरक्षित स्थळी हलवलं
बंगळुरू विमानतळावर तरुणाची कुऱ्हाडीने वार करून हत्या
कोलकाता महिला डॉक्टर बलात्कार आणि हत्येच्या घटनेवरून पंतप्रधान नरेंद्र मोदी आपल्या पक्षाचा वापर करून पश्चिम बंगालमध्ये आग लावत असल्याचा आरोप ममता बॅनर्जी यांनी केला आणि बंगाल पेटल्यास आसाम, ईशान्य, उत्तर प्रदेश, बिहार, झारखंड, ओडिशासह इतर राज्ये पेटतील असा इशारा दिला. त्यांनी पंतप्रधान नरेंद्र मोदींना दोष दिला आणि त्यांच्या पक्षावर बंगालमध्ये अशांतता पसरवल्याचा आरोप केला.
श्री. मोदीजी, तुम्ही तुमच्या पक्षाचा वापर करून इथे आग लावत आहात. बंगाल, आसाम, ईशान्य, उत्तर प्रदेश, बिहार, झारखंड, ओडिशा, दिल्ली जाळली तर जाळतील! आम्ही तुमची खुर्ची पाडू, असे त्या म्हणाल्या. बॅनर्जी पुढे म्हणाल्या, काही लोकांना वाटते की हा बांगलादेश आहे. कृपया लक्षात ठेवा, मला बांगलादेश आवडतो. ते आमच्यासारखे बोलतात आणि त्यांची संस्कृती आमच्यासारखीच आहे, परंतु बांगलादेश वेगळे राष्ट्र आहे आणि भारत वेगळे राष्ट्र आहे.
त्यांच्या या टिप्पणीनंतर त्यांना टीकेचा सामना करावा लागत आहे. विरोधी पक्षांनी त्यांच्यावर कायदा व सुव्यवस्था राखण्यात अपयशी ठरल्याचा आरोप केला आहे. भाजपने ममता बॅनर्जींवर जोरदार हल्ला केला आहे. त्यांच्या राजीनाम्याची मागणी जोर धरत आहे. त्यांच्या या वादग्रस्त वक्तव्यावर तीव्र प्रतिक्रिया व्यक्त करत भाजपच्या अनेक नेत्यांनी ममता बॅनर्जी यांच्यावर टीका केली. त्यांनी बॅनर्जींच्या राजीनाम्याची मागणी देखील केली आहे.
केंद्रीय मंत्री आणि बंगाल भाजपचे अध्यक्ष सुकांता मजुमदार यांनीही केंद्रीय गृहमंत्री अमित शहा यांना पत्र लिहिले आहे. यामध्ये त्यांनी कोलकाता येथे हिंसाचाराचे समर्थन केल्याबद्दल बॅनर्जी यांची निंदा केली आहे. मजुमदार यांनी लिहिलेल्या पत्रात असे लिहिले आहे की, मुख्यमंत्री ममता बॅनर्जी यांनी आज कोलकाता येथे टीएमसीच्या स्टुडंट विंगला संबोधित करताना, ‘मी कधीही बदला घेण्याचा प्रयत्न केला नाही, परंतु आता जे करणे आवश्यक आहे ते करा’ असे लोकांना भडकावले. राज्याच्या सर्वोच्च पदावरून सूडाच्या राजकारणाला जाहीर पाठिंबा देण्यापेक्षा हे कमी नाही.
भाजप नेते आणि पक्षाचे सोशल मीडिया प्रमुख अमित मालवीय यांनी लिहिले, कोपऱ्यात अडकलेल्या ममता बॅनर्जी यांनी पश्चिम बंगालमधील लोकांविरुद्ध युद्ध घोषित केले आहे. जे त्यांना आरजी कार मेडिकल कॉलेज आणि हॉस्पिटलमधील एका तरुण महिला डॉक्टरच्या क्रूर बलात्कार आणि हत्येप्रकरणी जबाबदार धरत आहेत.
