यंदा भारतातील सणासुदीच्या हंगामात २.१६ लाखांहून अधिक हंगामी (सीझनल) नोकऱ्या उपलब्ध होतील, असे एका अहवालात नमूद करण्यात आले आहे. २०२५ च्या दुसऱ्या सहामाहीत GIG आणि तात्पुरत्या रोजगारांमध्ये १५-२० टक्क्यांनी वाढ होण्याचा अंदाज व्यक्त करण्यात आला आहे. या वाढीस चालना देणाऱ्या प्रमुख क्षेत्रांमध्ये रिटेल, ई-कॉमर्स, बीएफएसआय (बँकिंग, फायनान्स, इंश्योरन्स), लॉजिस्टिक्स, हॉस्पिटॅलिटी, पर्यटन आणि एफएमसीजी (फास्ट मूव्हिंग कंझ्युमर गुड्स) यांचा समावेश आहे.
एचआर सेवा पुरवठादार ‘Adecco India’ ने त्यांच्या अहवालात म्हटले आहे की, रक्षाबंधन, बिग बिलियन डेज, प्राईम डे सेल, दसरा, दिवाळी आणि लग्नसराई यांसारख्या सण आणि कार्यक्रमांमुळे भरतीच्या क्रियाकलापांमध्ये लक्षणीय वेग आला आहे. अनेक कंपन्या सणासुदीच्या कालावधीत वाढलेल्या मागणीला पूर्ण करण्यासाठी भरती आणि ऑपरेशनल तयारी करत आहेत. अहवालानुसार, ग्राहकांचा आत्मविश्वास वाढणे, ग्रामीण भागातील मागणीत सुधारणा करणारा अनुकूल मान्सून, निवडणुकांनंतरचा आर्थिक आशावाद आणि हंगामी सवलती व ऑफर्स यामुळे यंदा भरतीत तेजी आली आहे.
हेही वाचा..
ओल्ड ट्रॅफर्डचा गड अजूनही भारत जिंकलेला नाही!
जुहू-विलेपार्लेत व्यापाऱ्याचे घर फोडून सव्वा कोटी पळवणाऱ्यांची धरली गचांडी
आठव्या क्रमांकावर डॉसन, इंग्लंडचा नवा ट्रम्प कार्ड!
दिल्ली-एनसीआर, मुंबई, चेन्नई, हैदराबाद, बंगळुरू, कोलकाता आणि पुणे यांसारखे महानगर रोजगार निर्मितीत आघाडीवर असून, गेल्या वर्षीच्या तुलनेत १९ टक्के अधिक मागणी नोंदली गेली आहे. लखनऊ, जयपूर, कोयंबतूर, नागपूर, भुवनेश्वर, मैसूर आणि वाराणसी यांसारख्या टियर-२ शहरांमध्ये नोकऱ्यांची मागणी ४२ टक्क्यांनी वाढली आहे. पगाराच्या पातळीतही वाढ होण्याची शक्यता आहे – महानगरांमध्ये १२-१५% आणि उदयोन्मुख शहरांमध्ये १८-२२% पर्यंत वाढ होऊ शकते.
अहवालात असेही नमूद करण्यात आले आहे की, यंदा हंगामी रोजगारांमध्ये महिलांची भागीदारी २३ टक्क्यांनी वाढली आहे. Adecco India चे संचालक व जनरल स्टाफिंग प्रमुख दीपेश गुप्ता यांनी सांगितले की, “यावर्षीचा सणासुदीचा हंगाम अधिक तीव्र आणि योजनाबद्ध वाटत आहे, आणि आम्ही त्यासाठी आधीच तयारी सुरू केली आहे. लॉजिस्टिक्स व डिलिव्हरी क्षेत्रात ३०-३५ टक्के भरती वाढण्याचा अंदाज आहे, कारण कंपन्या लास्ट-माईल डिलिव्हरी वाढवण्याचा प्रयत्न करत आहेत.
बीएफएसआय क्षेत्रात, विशेषतः टियर २ आणि ३ शहरांमध्ये क्रेडिट कार्ड विक्री आणि पीओएस (POS) इंस्टॉलेशनसाठी फील्ड फोर्स वाढवण्यात येत आहे. अहवालानुसार, हॉस्पिटॅलिटी आणि पर्यटन क्षेत्रात २०-२५ टक्क्यांनी भरती वाढेल, तर ई-कॉमर्स आणि रिटेल क्षेत्रात एकूण हंगामी नोकऱ्यांपैकी ३५-४० टक्क्यांपर्यंत वाटा असेल.
