छत्रपती शिवाजी महाराज आंतरराष्ट्रीय विमानतळावर पोलिसांनी मोठी कारवाई करत दोन विदेशी नागरिकांना बनावट भारतीय पासपोर्टसह पकडले. ही अटक केवळ अवैध प्रवासापुरती मर्यादित नसून मोठ्या बनावट कागदपत्रांच्या रॅकेटचा भांडाफोड करणारी ठरली आहे. पोलिसांनी दोघांविरुद्ध भारतीय न्याय संहिता (बीएनएस) कलम ३१८(४), ३३६(२)(३), ३४०(२) तसेच पासपोर्ट कायद्यान्वये गुन्हा दाखल करून त्यांना ताब्यात घेतले.
अटकेतील आरोपींची ओळख २९ वर्षीय नेपाळी नागरिक कृष्णा मार्पण तमांग आणि ६७ वर्षीय बांगलादेशी नागरिक निरंजन नाथ सुबल चंद्रनाथ अशी झाली आहे. पोलिसांच्या माहितीनुसार, दोघांनी कोलकात्यात बनावट कागदपत्रांच्या आधारे भारतीय पासपोर्ट तयार केले होते. या बनावट पासपोर्टचा वापर करून त्यांनी अनेक परदेश प्रवास केले आहेत. प्राथमिक तपासात उघड झाले की, पासपोर्ट मिळवण्यासाठी बनावट आधार कार्ड आणि इतर ओळखपत्रांचा आधार घेण्यात आला होता. प्राप्त माहितीनुसार, घटनेबाबत सहार पोलिस अधिकाऱ्यांनी सांगितले की, निरंजन नाथ हा ओमानची राजधानी मस्कत येथून मुंबईला परतत होता. इमिग्रेशन काउंटरवर त्याच्या कागदपत्रांची काटेकोर तपासणी करण्यात आली. यात पासपोर्टवरील तपशीलांमध्ये विसंगती आणि चुकीची माहिती आढळली. चौकशीत निरंजनने आपला गुन्हा कबूल केला. त्याने सांगितले की, पासपोर्ट बनावट असून तो कोलकात्यात तयार करण्यात आला होता.
हेही वाचा..
बीजापूरमध्ये चकमकीत दोन माओवादी ठार
नऊ वर्षांपूर्वीच्या लाच प्रकरणात बीएचयू क्लर्कला ५ वर्षांची कैद
पक्षाला आता गरज उरलेली नाही म्हणत प्रकाश महाजनांचा मनसेला जय महाराष्ट्र!
रशियाकडून तेल खरेदी करणाऱ्यांवर कर लावा
दुसरीकडे, कृष्णा मार्पण तमांग विदेशात जाण्याच्या तयारीत होता. चेक-इन काउंटरवर त्याच्या कागदपत्रांची तपासणी झाली आणि बनावटपणा उघड झाला. तोही कोलकात्यातून मिळवलेल्या बनावट पासपोर्टचा वापर करत होता. या दोन्ही अटकांमुळे पोलिसांना शंका आहे की हा एकटाच प्रकार नसून, हा परदेशी नागरिकांना भारतीय कागदपत्रे उपलब्ध करून देणाऱ्या एका संघटित टोळीचा भाग आहे. सहार पोलिस आता या रॅकेटच्या मुळापर्यंत जाण्याचा प्रयत्न करत आहेत. चौकशी सुरू असून, बनावट कागदपत्रे पुरवणारे एजंट आणि कोलकात्यातील पासपोर्ट रॅकेट यांच्याबाबत माहिती मिळवली जात आहे. अधिकाऱ्यांचे म्हणणे आहे की अशा गुन्ह्यांमुळे देशाच्या सुरक्षेला धोका निर्माण होतो, त्यामुळे चौकशी वेगाने सुरू आहे. या प्रकरणात आणखी अटक होण्याची शक्यता वर्तवली जात आहे.
