पंतप्रधान नरेंद्र मोदी यांनी मंगळवारी सर्वाधिक वयाचे मॅरेथॉन धावक फौजा सिंह यांच्या निधनावर शोक व्यक्त केला. पंतप्रधान मोदी म्हणाले की, माझ्या संवेदना त्यांच्या कुटुंबीयांसोबत तसेच जगभरातील त्यांच्या असंख्य चाहत्यांसोबत आहेत. पंतप्रधान मोदी यांनी सोशल मीडिया प्लॅटफॉर्म ‘एक्स’वर लिहिले, “फौजा सिंह हे एक विलक्षण व्यक्तिमत्व होते. त्यांनी आपल्या खास व्यक्तिमत्व आणि ‘फिटनेस’ या महत्त्वाच्या विषयाच्या माध्यमातून भारतातील तरुणांना प्रेरणा दिली. ते अद्वितीय दृढनिश्चय असलेले एक उत्कृष्ट अॅथलीट होते. त्यांच्या निधनाने मला फार दुःख झाले आहे. माझ्या संवेदना त्यांच्या कुटुंबीयांसोबत आणि जगभरात असलेल्या त्यांच्या असंख्य चाहत्यांसोबत आहेत.”
जगप्रसिद्ध अॅथलीट आणि सर्वाधिक वयाचे मॅरेथॉन धावक फौजा सिंह यांचे काही दिवसांपूर्वी रस्ते अपघातात निधन झाले. ११४ वर्षीय फौजा सिंह सोमवार सकाळी फेरफटक्यासाठी गेले असता, एका भरधाव कारने त्यांना जोरदार धडक दिली. अपघातानंतर कारचालक घटनास्थळावरून फरार झाला.
हेही वाचा..
मला आमंत्रित करायला नको होते का?
कॅनडा: भगवान जगन्नाथांच्या रथयात्रेवर अंडी फेकली, भारतात निषेध!
ओरिओ बिस्कीट अन् कॅप्सुलमधून कोकेनची तस्करी, ६२.६ कोटी रुपयांचा साठा जप्त!
गंभीर जखमी अवस्थेत फौजा सिंह यांना तत्काळ जालंधरमधील एका खासगी रुग्णालयात दाखल करण्यात आले, जिथे उपचारादरम्यान त्यांचे निधन झाले. घटनेची माहिती मिळताच जालंधर पोलिसांनी तपास सुरू केला. पोलिसांनी घटनास्थळी पाहणी केली असून फरार चालकाचा शोध घेण्यासाठी सीसीटीव्ही फुटेज तपासले जात आहेत आणि प्रत्यक्षदर्शींसोबत चौकशी सुरू आहे.
फौजा सिंह यांचा जन्म १ एप्रिल १९११ रोजी पंजाबमधील जालंधर जिल्ह्यातील ब्यास पिंड येथे झाला होता. चार भावंडांमध्ये सर्वात लहान असलेले फौजा लहानपणी शारीरिकदृष्ट्या खूप दुर्बल होते आणि पाचव्या वर्षीपर्यंत चालू शकत नव्हते. पण आपल्या असामान्य इच्छाशक्तीच्या जोरावर त्यांनी ही कमतरता आपली ताकद बनवली. लहानपणापासूनच त्यांना धावण्याची आवड होती. १९४७ च्या भारत-पाकिस्तान फाळणीचा त्यांच्या आयुष्यावर खोल परिणाम झाला. २०११ साली, जेव्हा त्यांचे वय १०० वर्षे होते, तेव्हा त्यांनी टोरांटो मॅरेथॉन ८ तास, ११ मिनिटे आणि ६ सेकंदांत पूर्ण करून जागतिक विक्रम नोंदवला. ते १०० वर्षांचे होऊनही मॅरेथॉन पूर्ण करणारे पहिले धावक ठरले, ज्यामुळे त्यांना जागतिक ओळख मिळाली.
