भारताचे पंतप्रधान नरेंद्र मोदी यांचे बुधवारी इथियोपियाच्या संसदेत खासदारांनी उभे राहून टाळ्यांच्या गजरात जोरदार स्वागत केले. यानिमित्ताने पंतप्रधान मोदींनी जगातील १८व्या संसदेला संबोधित करण्याचा मान मिळवला.
पंतप्रधान मोदी भाषणासाठी उभे राहताच खासदारांनी टाळ्या वाजवत त्यांचा उत्साह वाढवला. आपल्या भाषणात मोदी म्हणाले की, इथियोपियाच्या दौऱ्यात त्यांना घरासारखे वाटत आहे आणि आफ्रिकन देशाच्या संसदेला संबोधित करणे हा त्यांच्यासाठी “अत्यंत अभिमानाचा क्षण” आहे.
भारताच्या राष्ट्रीय गीत ‘वंदे मातरम’ आणि इथियोपियाच्या राष्ट्रगीताची तुलना करताना पंतप्रधान म्हणाले की, दोन्ही गीतांमध्ये मातृभूमीला आईचे स्थान दिले आहे. ही गीते आपल्याला आपल्या वारसा, संस्कृती आणि सौंदर्याचा अभिमान बाळगण्याची तसेच मातृभूमीच्या रक्षणासाठी प्रेरणा देतात.
यापूर्वी त्यांनी अदीस अबाबामधील अदवा विजय स्मारकाला पुष्पांजली अर्पण केली. हे स्मारक १८९६ साली झालेल्या ऐतिहासिक अदवा युद्धाची आठवण करून देते, ज्यात इथियोपियाच्या सैन्याने इटालियन आक्रमकांवर विजय मिळवला होता.
संसदेला संबोधित करताना पंतप्रधान मोदी म्हणाले,
“आज तुमच्यासमोर उभे राहणे माझ्यासाठी मोठा सन्मान आहे. शेरांची भूमी असलेल्या इथियोपियात येऊन फार आनंद झाला आहे. मला येथे घरासारखे वाटते, कारण भारतात माझे गृह राज्य गुजरातही शेरांचे घर आहे.”
ते पुढे म्हणाले, लोकशाहीच्या या मंदिरात, देशाच्या हृदयात उभे राहून, जुनी शहाणपण आणि आधुनिक आशा घेऊन येथे येणे हा माझ्यासाठी गौरवाचा क्षण आहे. तुमची संसद, तुमचे लोक आणि तुमची लोकशाहीची वाटचाल यांच्याबद्दल मला मनापासून आदर आहे. भारतातील १.४ अब्ज जनतेच्या वतीने मी मैत्री, सद्भावना आणि बंधुत्वाच्या शुभेच्छा घेऊन आलो आहे.”
इथियोपियाकडून मिळालेल्या सर्वोच्च सन्मानाबाबत बोलताना मोदी म्हणाले, भारताच्या जनतेच्या वतीने मी हात जोडून, अत्यंत नम्रतेने हा सन्मान स्वीकारतो.” इथियोपिया ही मानवी इतिहासातील सर्वात प्राचीन संस्कृतींपैकी एक असल्याचे त्यांनी नमूद केले. “येथे इतिहास डोंगरांमध्ये, दऱ्यांमध्ये आणि इथियोपियाच्या जनतेच्या हृदयात जिवंत आहे,” असेही त्यांनी सांगितले.
या वेळी इथियोपियाच्या खासदारांनी पुन्हा एकदा टाळ्यांचा कडकडाट केला. मोदी म्हणाले, आज इथियोपिया उंच उभा आहे कारण त्याच्या मुळा खोलवर रुजलेल्या आहेत. इथियोपियात उभे राहणे म्हणजे अशा भूमीवर उभे राहणे, जिथे भूतकाळाचा सन्मान केला जातो, वर्तमान उद्देशपूर्ण आहे आणि भविष्याचे खुले मनाने स्वागत केले जाते. जुने आणि नवे यांचा मेळ, परंपरा आणि आधुनिकतेतील संतुलन – हीच इथियोपियाची खरी ताकद आहे.”
‘सबका साथ, सबका विकास, सबका विश्वास, सबका प्रयास’ या भारताच्या संकल्पनेचा उल्लेख करत त्यांनी सांगितले की, हा विचार दोन्ही देशांमधील समान भावना आणि दृष्टिकोन दर्शवतो.
इथिओपियाच्या संसदेत पंतप्रधान मोदी यांनी केलेल्या प्रभावी भाषणानंतर तेथील मंत्री आणि खासदारांशी झालेला संवाद चर्चेचा विषय ठरला. द्विपक्षीय संबंध, विकास आणि सहकार्याच्या मुद्द्यांवर सकारात्मक चर्चा होत भारत–इथिओपिया मैत्री अधिक दृढ झाल्याचे चित्र दिसून आले.
