पंतप्रधान नरेंद्र मोदी दोन दिवसीय भूतान दौर्‍यावर

पंतप्रधान नरेंद्र मोदी ११ ते १२ नोव्हेंबर २०२५ दरम्यान भूतानच्या राजकीय दौर्‍यावर जाणार आहेत. या दौर्‍याचा उद्देश भारत आणि भूतान यांच्यातील मैत्रीपूर्ण आणि सहकार्याच्या विशेष नातेसंबंधांना अधिक बळकटी देणे हा आहे. हा दौरा दोन्ही देशांमधील उच्चस्तरीय द्विपक्षीय संवादाच्या परंपरेशी सुसंगत आहे. भारतीय परराष्ट्र मंत्रालयाने जारी केलेल्या निवेदनानुसार, या दौर्‍यादरम्यान पंतप्रधान मोदी भूतानचे राजे जिग्मे खेसर नामग्याल वांगचुक यांची भेट घेतील आणि दोन्ही देशांच्या सरकारांनी संयुक्तपणे विकसित केलेल्या १०२० मेगावॅटच्या पुनात्सांगछू-II जलविद्युत प्रकल्पाचे उद्घाटन करतील.

पंतप्रधान मोदी भूतानच्या चौथ्या राजे जिग्मे सिंग्ये वांगचुक यांच्या ७०व्या जयंतीनिमित्त आयोजित कार्यक्रमात सहभागी होतील. तसेच, ते भूतानचे पंतप्रधान शेरिंग तोबगे यांचीही भेट घेतील. पंतप्रधानांचा हा दौरा भगवान बुद्धांच्या पवित्र पिपराहवा अवशेषांच्या प्रदर्शनाच्या काळात होणार आहे. मोदी थिम्फू येथील ताशिचो द्ज़ोंगमध्ये या पवित्र अवशेषांचे पूजन करतील आणि भूतानच्या शाही सरकारतर्फे आयोजित जागतिक शांतता प्रार्थना महोत्सवात सहभागी होतील.

हेही वाचा..

मुंबईत रुग्णाच्या नातेवाइकांकडून डॉक्टरांवर हल्ला

१०० आजारांवर एक रामबाण उपाय

पत्नीस ठार मारून पतीने दाखल केली हवल्याची तक्रार

मानव तस्करी, मनी लॉन्ड्रिंग रॅकेटचा भंडाफोड

परराष्ट्र मंत्रालयाच्या निवेदनानुसार, भारत आणि भूतान यांच्यातील नाते हे परस्परांवरील गाढ विश्वास, सद्भावना आणि सन्मानाने ओतप्रोत असलेले एक अद्वितीय आणि आदर्श भागीदारीचे उदाहरण आहे. दोन्ही देशांच्या सामायिक आध्यात्मिक वारशातून आणि जनतेतील आपुलकीच्या संबंधांतून या विशेष नात्याचे दर्शन घडते. पंतप्रधानांचा हा दौरा दोन्ही देशांना द्विपक्षीय सहकार्य अधिक वृद्धिंगत करण्यासाठी, तसेच प्रादेशिक आणि आंतरराष्ट्रीय मुद्द्यांवर विचारविनिमय करण्याची संधी प्रदान करेल. यापूर्वी, पंतप्रधान मोदी यांनी २०२४ मध्ये भूतानचा दौरा केला होता. त्या वेळी भूतानचे राजे जिग्मे वांगचुक यांनी त्यांना देशातील सर्वोच्च ‘ऑर्डर ऑफ द्रुक ग्यालपो’ पुरस्काराने सन्मानित केले होते. मोदींनी हा पुरस्कार १४० कोटी भारतीय जनतेला समर्पित केला होता आणि म्हटले होते की भारत आणि भूतान हे एकत्रित वारशाचे भागीदार आहेत.