गेल्या काही दिवसांपासून उकाड्याने अक्षरशः हैराण झालेल्या पुणेकरांना अखेर पावसाने दिलासा दिला आहे. गुरुवारी दुपारनंतर अचानक वातावरणात मोठा बदल झाला आणि शहरातील अनेक भागांत विजांच्या कडकडाटासह मुसळधार पावसाने हजेरी लावली. विशेषतः हडपसर परिसरात जोरदार पाऊस कोसळल्याने नागरिकांना उकाड्यापासून काहीसा आराम मिळाला.
दुपारपर्यंत अंगाची लाही लाही करणारा उन्हाचा तडाखा सुरू होता. मात्र अचानक काळे ढग दाटून आले, वाऱ्याचा वेग वाढला आणि काही क्षणांतच पावसाने जोर धरला. अनेक ठिकाणी विजांचा कडकडाट ऐकू आला तर काही भागांत गारांसह पावसाची नोंद झाली.
दरम्यान, हवामान विभागाने पुण्यासह राज्यातील काही जिल्ह्यांसाठी सतर्कतेचा इशारा जारी केला आहे. पुणे, सातारा, रायगड आणि रत्नागिरी जिल्ह्यात पुढील काही तासांत विजांच्या कडकडाटासह मुसळधार पावसाची शक्यता व्यक्त करण्यात आली आहे. काही भागांत वादळी वाऱ्यांसह पाऊस कोसळू शकतो, असा अंदाज हवामान खात्याने वर्तवला आहे.
प्रशासनाने नागरिकांना सावध राहण्याचे आवाहन केले आहे. विजांच्या कडकडाटावेळी उघड्या जागेत न थांबणे, झाडाखाली आश्रय न घेणे आणि अनावश्यक प्रवास टाळण्याचा सल्ला देण्यात आला आहे.
पुढील काही तास पुणे आणि परिसरातील हवामान सतत बदलत राहण्याची शक्यता असून, अनेक भागांत पावसाचा जोर आणखी वाढू शकतो. त्यामुळे पुणेकरांनी छत्री आणि सतर्कता दोन्ही सोबत ठेवण्याची गरज निर्माण झाली आहे!