रजत पाटीदारचे सिम कार्ड घेतले, विराट कोहली, एबी डिव्हिलियर्सशी गप्पा मारल्या!

त्यांना वाटलं की कुणीतरी मजा करतोय. पण काही दिवसांनी त्यांना कॉल्स येऊ लागले – आणि कोणी म्हणत होतं, “हॅलो! मी विराट कोहली बोलतोय”, तर दुसरा म्हणत होता “मी एबी डिव्हिलियर्स आहे.” सुरुवातीला त्यांनी हे प्रँक समजून गमतीने घेतलं आणि उलटपक्षी स्वतःला “एम.एस. धोनी” म्हणून ओळखवू लागले.

१५ जुलैला मनीषला एक अनोळखी नंबरवरून कॉल आला. फोनवर एक शांत आणि विनम्र आवाज होता – “भाऊ, मी रजत पाटीदार बोलतोय. हा नंबर माझा आहे, कृपया तो परत करा.” पण मनीष आणि खेमराज अजूनही गमतीच्या मूडमध्ये होते. त्यांनी उत्तर दिलं – “आणि आम्ही एम.एस. धोनी आहोत!”

पाटीदारने समजावलं की हा नंबर त्याच्यासाठी महत्त्वाचा आहे, कारण याच नंबरवरून तो आपल्या कोच, मित्र आणि क्रिकेट जगतातील लोकांशी संपर्कात असतो. पण जेव्हा दोघं गमतीतून काहीच ऐकत नव्हते, तेव्हा पाटीदार म्हणाला – “ठीक आहे, मी पोलीस पाठवतो.” आणि १० मिनिटांत पोलीस त्यांच्या घरी हजर झाले. तेव्हा मनीष आणि खेमराजला कळलं की ते खरोखरच विराट कोहली, एबी डिव्हिलियर्स आणि रजत पाटीदारसारख्या स्टार्सशी संवाद साधत होते. यानंतर त्यांनी तत्काळ सिमकार्ड परत केलं.

हे ही वाचा : 

संपूर्ण प्रकरण काय?

खरे तर, या घटनेची कहाणी ऐकून सर्वांना आश्चर्य वाटेल. झाले असे की, आरसीबीचा कर्णधार रजत पाटीदार यांचा जुना नंबर ९० दिवसांपेक्षा जास्त काळ सक्रिय नव्हता. वृत्तानुसार, या नंबरवर रिचार्ज नसल्याने, टेलिकॉम प्रोव्हायडरने हा नंबर निष्क्रिय केला आणि पुन्हा नव्याने तो विक्रीस काढला. यानंतर छत्तीसगढच्या मनीषने नव्याने घेतलेल्या सीमकार्ड मार्फत त्याला हा नंबर मिळाला आणि हा सर्व घोळ झाला. दरम्यान, विराट कोहलीचा चाहता असलेल्या मनीषने ही घटना अविस्मरणीय असल्याचे वर्णन केले. “मला आशा आहे की कधीतरी पाटीदारांना भेटेन,” असे तो म्हणाला. तर मनीषचा मित्र खेमराज म्हणाला, “चुकीच्या नंबरमुळे मला कोहलीशी बोलण्याची संधी मिळाली, माझ्या आयुष्यातील स्वप्न पूर्ण झाले”.