बिहारच्या नालंदा जिल्ह्यातील शीतला मंदिरात मंगळवार, ३१ मार्च रोजी धार्मिक मेळाव्यादरम्यान चेंगराचेंगरी झाल्याचे समोर आले आहे. या घटनेत किमान आठ महिला ठार झाल्या असून अनेक जण जखमी झाले आहेत. मोठ्या संख्येने भाविक दर्शनासाठी मंदिरात जमल्याने प्रचंड गर्दी झाली आणि चेंगराचेंगरी झाली, ज्यात अनेक जण चिरडले गेले, अशी माहिती आहे. घटनेची माहिती मिळताच, पोलीस अधिकारी स्थानिक गावकऱ्यांसह घटनास्थळी दाखल झाले आणि त्यांनी मदत व बचाव कार्य सुरू केले.
प्रत्यक्षदर्शींच्या मते, पूजेदरम्यान अचानक धक्काबुक्की सुरू झाली, जी काही क्षणातच चेंगराचेंगरीत रूपांतरित झाली. लोक एकमेकांवर पडू लागले आणि बाहेर पडण्याच्या प्रयत्नात गोंधळ उडाला. यावेळी अनेक भाविक गंभीर जखमी झाले आणि दोन जणांचा घटनास्थळीच मृत्यू झाला. घटनेची माहिती मिळताच प्रशासन आणि पोलीस पथक तातडीने घटनास्थळी पोहोचले. रुग्णवाहिकाही घटनास्थळी पाठवण्यात आल्या. त्यांच्या मदतीने जखमींना तातडीने नालंदा सदर रुग्णालयात दाखल करण्यात आले. डॉक्टरांचे पथक टीम जखमींचे उपचार करत आहेत. मिळालेल्या वृत्तानुसार, राष्ट्रपती द्रौपदी मुर्मू देखील नालंदामध्ये आहेत. त्या नालंदा विद्यापीठातील दीक्षांत समारंभाला उपस्थित राहण्यासाठी आल्या आहेत.
बिहार सरकारच्या मुख्य सचिवांनी या घटनेची सखोल चौकशी करण्याचे निर्देश दिले असून, जखमींना योग्य वैद्यकीय उपचार मिळावेत याची खात्री करण्याचे निर्देशही दिले आहेत. तसेच, मंदिरात लवकरात लवकर परिस्थिती पूर्ववत करण्याची जबाबदारीही अधिकाऱ्यांवर सोपवण्यात आली आहे. परिस्थितीचा आढावा घेण्यासाठी पाटणा आयुक्तांना बिहार शरीफ येथे पाठवण्यात आले आहे.
हे ही वाचा:
२५ दिवस ‘डिजिटल अटकेत’ ठेवून निवृत्त अधिकाऱ्याचे १.५७ कोटी लुबाडले
ईडीकडून १,१०५ बँक फसवणूक प्रकरणांत ६४,९२० कोटींची मालमत्ता जप्त
मुंबई महानगरपालिकेच्या आयुक्तपदासाठी अश्विनी भिडेंचे नाव आघाडीवर
इराणहून भारताकडे जाणाऱ्या विमानावर अमेरिकेचा हल्ला
बिहारचे उपमुख्यमंत्री सम्राट चौधरी यांनीही चेंगराचेंगरीच्या घटनेबद्दल शोक व्यक्त केला आणि या घटनेला अत्यंत हृदयद्रावक म्हटले. ते म्हणाले की, सरकार बाधित कुटुंबांना सर्वतोपरी मदत आणि दिलासा देत असून, जखमींच्या योग्य उपचारांची व्यवस्था केली आहे. “नालंदा येथील माता शीतला मंदिरात झालेली भीषण चेंगराचेंगरीची घटना अत्यंत हृदयद्रावक आहे. या दुर्घटनेत प्राण गमावलेल्या आणि जखमी झालेल्या सर्व भाविकांच्या कुटुंबीयांप्रति मी माझ्या संवेदना व्यक्त करतो,” असे चौधरी यांनी पोस्टमध्ये म्हटले आहे.