फुकेत-दिल्ली विमानातील घटनेनंतर एअर इंडियाने आपल्या सर्व पायलट्सची अनिवार्य ड्रग स्क्रीनिंग सुरू केली आहे. या तपासणीत आता आणखी दोन पायलट्सचे रिपोर्ट ‘नॉन-निगेटिव्ह’ आले आहेत. त्यांच्या नमुन्यांना पुढील तपासणीसाठी पाठवण्यात आले असून, अंतिम निकालाची प्रतीक्षा आहे.
महत्त्वाचे म्हणजे, ‘नॉन-निगेटिव्ह’ म्हणजे संबंधित पायलटने प्रतिबंधित अमली पदार्थ घेतल्याचे निश्चित झाले, असा अर्थ होत नाही. प्राथमिक स्क्रीनिंगमध्ये एखाद्या पदार्थाचे किंवा रासायनिक घटकाचे संकेत मिळाल्यानंतर त्याची पुष्टी करण्यासाठी पुढील चाचणी केली जाते. त्यामुळे या दोन्ही पायलट्सबाबत अंतिम निष्कर्ष त्यांच्या कन्फर्मेटरी टेस्टनंतरच समोर येणार आहे.
एअर इंडिया ग्रुपने १३ ऑगस्टपासून सर्व पायलट्ससाठी १०० टक्के ड्रग स्क्रीनिंग सुरू केले आहे. आतापर्यंत सुमारे ३०० ते ४०० पायलट्सची तपासणी करण्यात आली असून प्रक्रिया अद्याप सुरू आहे. एअर इंडिया आणि एअर इंडिया एक्स्प्रेसमध्ये मिळून सुमारे ५ हजार पायलट्स आहेत. ही तपासणी ग्रुपच्या गुरुग्राम अकादमीतील प्रशिक्षणादरम्यान, विमान उड्डाणानंतर, फ्लाइट ब्रीफिंग सेंटर तसेच एअर इंडियाच्या कार्यालयांमध्ये किंवा संबंधित बेसने निश्चित केलेल्या ठिकाणी केली जात आहे. पायलट्सकडून नियमांनुसार प्रतिबंधित असलेल्या पदार्थांसोबतच काही प्रतिबंधित औषधांचीही तपासणी केली जात आहे.
हे ही वाचा:
जुलैमध्ये बांगलादेशात पाठवलेल्या महिलेला मुंबईत पुन्हा अटक
लक्ष्मी मित्तल यांच्या युक्रेनमधील स्टील प्लांटवर रशियाचा हल्ला
कच्च्या तेलाची धग बाजाराला; सेन्सेक्स ३०० अंकांहून अधिक घसरला
“मला कार्यमुक्त करा” शहजाद पूनावाला यांचा पुन्हा राजीनामा
४ ऑगस्ट रोजी एअर इंडियाच्या AI2379 या फुकेत-दिल्ली विमानात उड्डाणादरम्यान विमानाची उंची अचानक सुमारे ३०० फूटांनी कमी झाली होती. या घटनेत प्रवासी आणि क्रू सदस्य जखमी झाले होते. या घटनेची चौकशी विमान अपघात तपास ब्युरो (AAIB) करत आहे. या विमानाच्या कॅप्टनची प्राथमिक तसेच त्यानंतरच्या कन्फर्मेटरी चाचणीत मारिजुआनासाठी पॉझिटिव्ह चाचणी आल्याचे यापूर्वी समोर आले आहे. त्यानंतर एअर इंडियाने संपूर्ण पायलट ग्रुपची अनिवार्य तपासणी करण्याचा निर्णय घेतला.