आरसीबीच्या चाहत्यांचं एक वाक्य ठरलेलं – “हे आपले वर्ष!” आणि प्रत्येक वर्षी नशीब त्यांना सांगतं – “बस बाबा, पुढच्या वर्षी बघू!” यंदा मात्र विराटच्या दुखापतग्रस्त बोटाची जास्त चर्चा आहे की संघाच्या खेळाची, हेच समजत नाहीये!
गुजरात टायटन्सविरुद्धच्या सामन्यात विराट कोहलीने बाउंड्री वाचवताना झोकून दिलं, पण चेंडूने त्याच्या बोटावर आदळून सीमापार गेला. विराट वेदनेने मुरडला, आणि चाहते घाबरले! मैदानावर फिजिओ धावत आला, पण कोहली काहीसं नाराज दिसत होता. सामना संपल्यानंतर आरसीबीचे मुख्य प्रशिक्षक अँडी फ्लॉवर यांनी दिलासादायक अपडेट दिलं – “विराट एकदम ठणठणीत आहे, आणि चिंता करण्याची गरज नाही!” म्हणजे आरसीबीच्या चाहत्यांनी सुस्कारा सोडला!
सामन्याच्या निकालाची गोष्ट मात्र वेगळीच. आरसीबीची सुरुवात तशी चांगली नाहीच म्हणायची. मोहम्मद सिराज नावाच्या वादळाने त्यांची उरलीसुरली आशाही उडवली! हा तोच सिराज, जो सात वर्षं आरसीबीसाठी खेळला, आणि आता नव्या संघाकडून त्यांच्याच विरोधात तिखट गोलंदाजी करत होता. १९ धावांत ३ बळी घेत सिराजने जुन्या संघाला रिटर्न गिफ्ट दिलं!
फ्लॉवर म्हणताहेत, “दव होते,, त्यामुळे टॉस जिंकणं महत्त्वाचं होतं. पहिल्या डावात चेंडू थोडा थांबून येत होता. चिन्नास्वामीचं मैदान बहुतेकवेळा फलंदाजांसाठी नंदनवन असतं, पण आज तसं नव्हतं. मात्र, खरं कारण हे की गुजरातने आम्हाला रोखून ठेवलं होतं!”
हेही वाचा :
हिरवी मूग डाळ प्रथिनांचा खजाना
उद्धव ठाकरे म्हणतात, अमेरिका कर लादणार म्हणून आले वक्फ विधेयक
बँकॉकमधील स्वागताने पंतप्रधान मोदी भारावले
मणिपूरमधील राष्ट्रपती राजवटीचा प्रस्ताव मध्यरात्री लोकसभेत मंजूर
लियाम लिव्हिंगस्टोनने काहीशी झुंज दिली, ४० चेंडूत ५४ धावा काढल्या. जितेश शर्मा (३३) आणि टिम डेविड (३२) यांनीही हातभार लावला. आरसीबी १६९/८ पर्यंत पोहोचली, पण ही धावसंख्या म्हणजे मराठीत सांगायचं झालं, तर “थोडक्यात निभावलं, पण उपयोग नाही!”
सध्या आरसीबीची सूत्रं रजत पाटीदारच्या हाती आहेत. आरसीबी आता चार दिवस विश्रांती घेणार आणि मग मुंबई इंडियन्सशी भिडणार! सामना ७ एप्रिलला वानखेडेवर. विराटच्या बोटाला त्रास झाला, तो सावरला, पण आरसीबीच्या नशिबाचं काय? यंदा त्यांचं ‘हे आपले वर्ष’ ठरणार की “चल पुढच्या वर्षी बघू” हे पाहायचं!
