उत्तर प्रदेशातील संभल येथील नरौली शहरात ‘फ्री गाझा, फ्री पॅलेस्टाईन’ असे पोस्टर्स लावल्याने खळबळ उडाली होती. या प्रकरणी पोलिसांनी सात तरुणांना अटक केली आहे. याशिवाय या पोस्टर्सवर इस्रायली वस्तूंवर बहिष्कार टाकण्याचे आवाहनही करण्यात आले होते. शहरातील काही दुकानांच्या भिंतींवर हे पोस्टर्स चिकटवल्याचे दिसण्यात आले होते. पोस्टर्स लावणाऱ्यांवर बीएनएस कलम १२६ अंतर्गत एफआयआर नोंदवण्यात आला आहे.
बनियाथेरा पोलिस ठाणे परिसरातील नरौली येथील दुकानांच्या भिंतींवर, पोलिस चौकीबाहेर, मदरशांवर आणि विजेच्या खांबांवर काही तरुणांनी रात्री ‘फ्री गाझा, फ्री पॅलेस्टाईन’चे पोस्टर चिकटवले होते. या पोस्टरमध्ये इस्रायली वस्तूंवर बहिष्कार टाकण्याबद्दलही भाष्य करण्यात आले होते. या प्रकरणाची माहिती मिळताच पोलिसांनी आरोपींचा शोध सुरू केला. सीसीटीव्ही फुटेजमधून मिळालेल्या माहितीच्या आधारे आरोपींची ओळख पटवण्यात आल्याचे पोलिस स्टेशनचे प्रमुख रामवीर सिंह यांनी सांगितले. याशिवाय, पोलिसांनी पोस्टर्स लावलेल्या ठिकाणांजवळील दुकानदारांकडूनही माहिती गोळा केली.
अखेर या प्रकरणी रविवारी पोलिसांनी असीम, सैफ अली, मतलूब, फरदीन, अरमान, अरबाज या जनेटा गावातील रहिवासी आणि नरौली येथील रईस यांना अटक केली. अटक केलेल्या या सात तरुणांना रविवारी उपजिल्हा दंडाधिकाऱ्यांसमोर हजर करण्यात आले, तेथून त्यांना न्यायालयीन कोठडीत तुरुंगात पाठवण्यात आले. हिंदू संघटनांनी याला सामाजिक सलोखा बिघडवण्याचा प्रयत्न असल्याचे म्हटले आहे आणि कठोर कारवाईची मागणी केली आहे.
हे ही वाचा..
“पोप फ्रान्सिस यांना करुणा, आध्यात्मिक धैर्याचे दीपस्तंभ म्हणून लक्षात ठेवलं जाईल”
न्यायाधीशांना जाब विचारणारा इंदिरा गांधींचा जुना व्हीडिओ व्हायरल
१८० अधिकाऱ्यांपैकी ४१ टक्के महिला
सोशल मीडियावर फ्री गाझा आणि फ्री पॅलेस्टाईनचे पोस्टरही व्हायरल होत आहे. या पोस्टरमध्ये लिहिले आहे की, “प्रत्येक मुस्लिमांचे कर्तव्य बनले आहे की ते केवळ इस्रायली वस्तूंवरच नव्हे तर इस्रायलशी संबंधित असलेल्या प्रत्येक उत्पादनावर बहिष्कार टाकतील. गाझा हे पॅलेस्टिनी शहर पूर्णपणे उद्ध्वस्त झाले आहे. जर तुमच्या पॅलेस्टिनी भावांचे आणि बहिणींचे शहीद झालेले मृतदेह पाहून तुम्हाला रडावे वाटत नसेल, तर लक्षात ठेवा की आपण मेलो आहोत. म्हणून तुम्हाला विनंती आहे की इस्रायली वस्तू खरेदी करू नका. जर तुम्ही इस्रायली अन्नपदार्थ खरेदी केले तर ते तुमच्यासाठी डुकराचे मांस खाणे किंवा दारू पिण्याइतके निषिद्ध आहे.”
