अजित डोभाल यांनी अनेक देशांना कोणती माहिती दिली ?

‘ऑपरेशन सिंदूर’ अंतर्गत पाकिस्तान आणि पाकव्याप्त काश्मीर (POK) मधील ९ दहशतवादी ठिकाणांवर हल्ला करण्यात आल्यानंतर राष्ट्रीय सुरक्षा सल्लागार अजित डोभाल यांनी अनेक देशांच्या NSA सोबत संपर्क साधला आणि भारताने का आणि कशी कारवाई केली याची सविस्तर माहिती दिली. प्राप्त माहितीनुसार, अमेरिकेचे NSA आणि परराष्ट्र मंत्री मार्को रुबियो, ब्रिटनचे NSA जोनाथन पॉवेल, सौदी अरेबियाचे NSA मुसैद अल ऐबन, UAE चे NSA शेख तहनून, UAE राष्ट्रीय सुरक्षा परिषदेचे महासचिव अली अल शम्सी आणि जपानचे NSA मासातका ओकानो यांच्याशी डोभाल यांनी संवाद साधला.

त्याचबरोबर, रशियाचे NSA सर्गेई शोइगु, चीनचे परराष्ट्र मंत्री वांग यी (जे कम्युनिस्ट पार्टीच्या पोलित ब्युरोचे सदस्य देखील आहेत), आणि फ्रान्सचे राष्ट्रपतींचे राजनयिक सल्लागार इमॅन्युएल बोन्ने यांच्याशीही संपर्क करण्यात आला. NSA डोभाल यांनी स्पष्ट केलं की, भारताचा उद्देश संघर्ष वाढवण्याचा नाही, पण जर पाकिस्तानकडून यासंदर्भात काही हालचाल झाली, तर भारत सज्ज असून ठाम प्रत्युत्तर देईल.

हेही वाचा..

जम्मूसह ५ नव्या आयआयटी संस्थांच्या विस्तारास केंद्राची मंजुरी

मुंबईच्या तोंडातला घास गुजरातने हिसकावला!

‘ऑपरेशन सिंदूर’बद्दल पर्यटक काय म्हणतायत ?

मुंबई इंडियन्सने जिंकलेला सामना गमावला

NSA डोभाल पुढील काही दिवसांतही आंतरराष्ट्रीय समकक्षांशी संपर्कात राहणार आहेत. दरम्यान, भारतीय सैन्य, वायुसेना आणि परराष्ट्र मंत्रालय यांनी बुधवारी संयुक्त पत्रकार परिषद घेतली, ज्यात परराष्ट्र सचिव विक्रम मिस्री, वायुसेनेच्या विंग कमांडर व्योमिका सिंह आणि भारतीय लष्कराच्या कर्नल सोफिया कुरैशी सहभागी होत्या. या वेळी दहशतवादी ठिकाणांवर करण्यात आलेल्या हल्ल्याचे व्हिडिओ क्लिप्स देखील दाखवण्यात आल्या. कर्नल सोफिया कुरैशी यांनी माहिती दिली की, “पहलगाम दहशतवादी हल्ल्यातील पीडितांना न्याय मिळावा यासाठी ‘ऑपरेशन सिंदूर’ राबवण्यात आले. ९ दहशतवादी प्रशिक्षण शिबिरांचा नाश करण्यात आला. गेल्या तीन दशकांपासून पाकिस्तान आणि POK मध्ये दहशतवादी तळ उभे राहिले होते.”

त्यांनी नमूद केलं की, POK मधील मुजफ्फराबादजवळील सवाई नाला कॅम्प हा लष्कर-ए-तैयबाचा प्रशिक्षण केंद्र होता, जे LOC पासून ३० किमी अंतरावर आहे. २० ऑक्टोबर २०२४ ला सोनमर्ग, २४ ऑक्टोबर २०२४ ला गुलमर्ग आणि २२ एप्रिल २०२५ ला पहलगाम येथे झालेल्या हल्ल्यांमध्ये सहभागी दहशतवाद्यांना याच ठिकाणी प्रशिक्षण देण्यात आले होते.