पाकिस्तानमध्ये पोलिओचे तीन नवीन रुग्ण आढळले

पाकिस्तानमध्ये पोलिओचे आणखी तीन नवीन रुग्ण आढळले असून, यामुळे २०२५ सालात एकूण पोलिओ रुग्णांची संख्या १७ झाली आहे. या ताज्या प्रकरणांपैकी दोन खैबर पख्तूनख्वा आणि एक सिंध प्रांतातील आहे. नॅशनल इन्स्टिट्यूट ऑफ हेल्थ (एनआयएच) च्या रीजनल रेफरन्स लॅबोरेटरी फॉर पोलिओ इरॅडिकेशननुसार, हे नवीन रुग्ण उत्तर वझिरिस्तान, लक्की मरवत (खैबर पख्तूनख्वा) आणि उमरकोट (सिंध) येथून समोर आले आहेत.

या रुग्णांमध्ये १५ महिन्यांची मुलगी (लक्की मरवतच्या तख्तीखेल युनियन कौन्सिलमधून), ६ महिन्यांची मुलगी (उत्तर वझिरिस्तानच्या मीर अली-३ युनियन कौन्सिलमधून), ५ वर्षांचा मुलगा (उमरकोटच्या चाजरो युनियन कौन्सिलमधून) यांचा समावेश आहे. २०२५ मधील एकूण १७ पोलिओ रुग्णांपैकी, १० खैबर पख्तूनख्वामध्ये, ५ सिंधमध्ये, १ पंजाबमध्ये, आणि १ पाकिस्तान-अधिकृत गिलगित-बाल्टिस्तानमध्ये नोंदवले गेले आहेत.

हेही वाचा..

थायलंड-कंबोडिया सीमेवर संघर्ष

झेपावण्यास सारे आकाश बाकी हे…

अमरेश जेना लैंगिक अत्याचार प्रकरणात निलंबित

तुमचं प्रेम माझी सर्वात मोठी ताकद आहे

जागतिक आरोग्य संघटनेनुसार (WHO), पोलिओ हा एक संसर्गजन्य विषाणूजन्य आजार असून, तो मुख्यतः पाच वर्षांखालील लहान मुलांना बाधित करतो. यावर कोणताही उपचार उपलब्ध नाही, मात्र पुनःपुन्हा दिल्या जाणाऱ्या लसीकरणाद्वारे याचा प्रभावी प्रतिबंध करता येतो. दरम्यान, २१ ते २७ जुलै दरम्यान अफगाणिस्तानच्या सब-नॅशनल पोलिओ मोहीमेसोबत समन्वय साधून पाकिस्तानमधील सीमावर्ती युनियन कौन्सिल्समध्ये विशेष लसीकरण मोहीम राबवली जात आहे. त्याचबरोबर, २१ जुलैपासून बलुचिस्तानच्या चमन जिल्ह्यात एक फ्रॅक्शनल IPV-OPV (इनॲक्टिव्हेटेड पोलिओ व्हॅक्सीन आणि ओरल पोलिओ व्हॅक्सीन) अभियान सुरू झाले आहे, जे २८ जुलैपासून प्रांतातील इतर सहा जिल्ह्यांमध्येही राबवले जाणार आहे.

एनआयएचच्या लॅबने ३१ जिल्ह्यांमधील सांडपाण्याच्या लाईनमधून ३८ नमुने गोळा करून तपासणी केली, ज्यात डेरा इस्माईल खान, सुक्कूर आणि कराची येथील नमुन्यांमध्ये वाइल्ड पोलिओ व्हायरस टाइप १ आढळून आला. याचा अर्थ या भागांमध्ये अजूनही पोलिओ विषाणू सक्रिय आहे आणि त्यामुळे मुलांना संसर्ग होण्याचा धोका आहे. यावर एकमेव उपाय म्हणजे लसीकरण.

याआधी मे महिन्यात एनआयएच इस्लामाबादने सांगितले होते की, देशातील १८ जिल्ह्यांमधील सांडपाण्यातून घेतलेल्या नमुन्यांमध्ये वाइल्ड पोलिओ व्हायरस टाइप १ आढळला होता, जे नमुने ७ ते १७ एप्रिल दरम्यान घेतले गेले होते. पोलिओग्रस्त जिल्ह्यांमध्ये डेरा इस्माईल खान, सुक्कूर, कराची, पेशावर, टांक, उत्तर वझिरिस्तान, लाहोर, रावळपिंडी, लोरालाई, क्वेटा, झोब, इस्लामाबाद, अ‍ॅबोटाबाद, बन्नू, बादिन, जमशोरो, हैदराबाद आणि काशमोर यांचा समावेश आहे. एका निवेदनानुसार, बलुचिस्तानच्या चमन जिल्ह्यात २१ जुलैपासून फ्रॅक्शनल IPV-OPV लसीकरण मोहीम सुरू झाली आहे, जी २८ जुलैपासून प्रांतातील इतर सहा जिल्ह्यांमध्येही राबवली जाईल.