भारतात अटक केलेली एफबीआयची मोस्ट वॉन्टेड फरारी ‘सिंडी सिंग’ कोण आहे?

एफबीआयने भारतीय अधिकारी आणि इंटरपोलच्या सहकार्याने सिंडी सिंगला भारतात अटक केली. एफबीआयचे संचालक काश पटेल यांनीही भारतीय अधिकाऱ्यांचे कौतुक केले आहे. पटेल यांनी सोशल मीडियावरील पोस्टमध्ये म्हटले आहे की, एफबीआयने अमेरिकेतील टॉप १० फरार गुन्हेगारांपैकी एक असलेल्या सिंडी रॉड्रिग्ज सिंगला अटक केली आहे. सिंडी तिच्या मुलाच्या हत्येप्रकरणी हवी होती.

अधिकारी काश पटेल म्हणाले की, मार्च २०२३ मध्ये, टेक्सासमधील एव्हरमन येथील पोलिसांनी सिंडीचा मुलगा अनेक दिवसांपासून दिसला नसल्याने त्याचा शोध सुरू केला होता. सिंडीने तिच्या मुलाबद्दल पोलिसांना खोटे सांगितले आणि पोलिसांची दिशाभूल केली. पोलिस चौकशीनंतर सिंडी अमेरिकेतून पळून गेली आणि भारतात पोहोचली.  

संपूर्ण प्रकरण काय आहे?

ऑक्टोबर २०२३ मध्ये सिंडी सिंगविरुद्ध मुलाच्या हत्येचा गुन्हा दाखल करण्यात आला होता. त्याच वर्षी नोव्हेंबरमध्ये पोलिसांनी सिंडीच्या अटकेसाठी वॉरंट जारी केले. अमेरिकेतील कायदेशीर खटले टाळण्यासाठी सिंडी भारतात पळून गेली होती. सिंडी रॉड्रिग्जवर २५ हजार डॉलर्सचे बक्षीस जाहीर करण्यात आले होते.  

सिंडी सिंग कोण आहे?

१९८५ मध्ये जन्मलेली सिंडी रॉड्रिग्ज सिंग टेक्सासमधील डॅलस येथे राहत होती आणि ती भारतीय वंशाची आहे. २०२३ मध्ये, सिंडीवर तिच्या ६ वर्षांच्या मुलाची हत्या केल्याचा आरोप होता. तिचा मुलगा नोएल अल्वारेझ ऑक्टोबर २०२२ मध्ये शेवटचा दिसला होता. तथापि, कुटुंबाने मार्च २०२३ पर्यंत बेपत्ता व्यक्तीची तक्रार दाखल केली नव्हती. नोएल बेपत्ता झाल्यानंतर, टेक्सासमध्ये अंबर अलर्ट जारी करण्यात आला. 

आरोपी सिंडीने तपासकर्त्यांना खोटे सांगितले की तिचा मुलगा त्याच्या वडिलांसोबत मेक्सिकोमध्ये आहे आणि नोव्हेंबर २०२२ पासून तिथे आहे. तपासानंतर दोन दिवसांनी, आरोपी सिंडी सिंग, तिचा पती आणि सहा मुलांसह भारताला जाणाऱ्या आंतरराष्ट्रीय विमानात चढताना दिसले. मात्र, त्यांच्यासोबत त्यांचा ६ वर्षांचा नव्हता, ज्याला मारल्याचा तिच्यावर आरोप आहे.

हे ही वाचा : 

तिला कसे पकडले गेले?

ऑक्टोबर २०२४ मध्ये, सिंडी सिंगविरुद्ध इंटरपोलने रेड नोटीस जारी केली आणि सर्व सदस्य देशांना पाठवली. त्या काळात, प्रत्यार्पणाशी संबंधित कागदपत्रे देखील भारताला देण्यात आली. त्यानंतर, सिंडी सिंगची अटक शक्य झाली आणि तिला अटक केली.