युक्रेनवर रशियाचा भीषण क्षेपणास्त्र, ड्रोन हल्ला

युक्रेनची राजधानी कीव्हवर रशियाने केलेल्या मोठ्या क्षेपणास्त्र आणि ड्रोन हल्ल्यानंतर युद्ध आणखी तीव्र झाले आहे. या हल्ल्यात कीव्हमध्ये मोठी जीवितहानी आणि मालमत्तेचे नुकसान झाले. त्यानंतर युक्रेननेही रशियातील सीमावर्ती भागांवर ड्रोन हल्ले चढवत प्रत्युत्तर दिले. या हल्ल्यांमध्ये रशियात किमान दोन जणांचा मृत्यू झाला असून अनेक जण जखमी झाले आहेत.

रशियाने बुधवारी मध्यरात्रीनंतर कीव्हवर शेकडो ड्रोन आणि डझनभर क्षेपणास्त्रांचा मारा केला. हा २०२६ मधील राजधानीवरील सर्वात भीषण हल्ल्यांपैकी एक मानला जात आहे. अनेक निवासी इमारती, हॉटेल्स, शैक्षणिक संस्था आणि सार्वजनिक पायाभूत सुविधांचे मोठे नुकसान झाले. बचाव पथकांनी ढिगाऱ्याखाली अडकलेल्या नागरिकांचा शोध सुरू ठेवला असून मृतांचा आकडा वाढण्याची शक्यता व्यक्त करण्यात आली आहे.

कीव्हवरील हल्ल्यानंतर युक्रेनने रशियाच्या सीमावर्ती भागांवर ड्रोन हल्ले केले. रशियन अधिकाऱ्यांच्या माहितीनुसार, या हल्ल्यांमध्ये दोन नागरिकांचा मृत्यू झाला, तर काही जण जखमी झाले. अनेक निवासी इमारती आणि ऊर्जा सुविधांचेही नुकसान झाल्याचे सांगण्यात आले आहे. रशियाने बहुतांश ड्रोन पाडल्याचा दावा केला असला, तरी काही ड्रोन लक्ष्यांवर आदळल्याची कबुलीही दिली आहे.

युक्रेनचे राष्ट्राध्यक्ष वोलोदिमिर झेलेन्स्की यांनी रशियाच्या हल्ल्याचा तीव्र निषेध करत नागरी भागांना लक्ष्य करणे हा युद्धगुन्हा असल्याचे म्हटले आहे. त्यांनी पाश्चिमात्य देशांना हवाई संरक्षण प्रणाली अधिक वेगाने उपलब्ध करून देण्याचे आवाहन केले. दुसरीकडे, क्रेमलिनने हा हल्ला युक्रेनच्या रशियातील वाढत्या ड्रोन हल्ल्यांना दिलेले प्रत्युत्तर असल्याचा दावा केला आहे.

हे ही वाचा:

ध्रुव राठीच्या वादग्रस्त व्हिडिओबाबत १५ दिवसांत निर्णय घ्या!

थलपती विजय यांना अपशब्द; डीएमके आमदार जेरबंद

पंतप्रधान नरेंद्र मोदी पुढील आठवड्यात न्यूझीलंड दौऱ्यावर

पाकिस्तानने भारताशी स्पर्धा न करता अंतर्गत प्रश्न सोडवावे!

रशिया आणि युक्रेनमधील संघर्ष पाचव्या वर्षात प्रवेश केला असून दोन्ही देशांकडून हवाई हल्ल्यांची तीव्रता वाढत आहे. ऊर्जा प्रकल्प, लष्करी तळ आणि नागरी वस्त्यांवर सुरू असलेल्या हल्ल्यांमुळे दोन्ही देशांतील नागरिकांवर मोठा परिणाम होत आहे. आंतरराष्ट्रीय समुदायाने पुन्हा एकदा संयम बाळगण्याचे आणि युद्ध थांबवण्यासाठी राजनैतिक प्रयत्न वाढवण्याचे आवाहन केले आहे.