रोहन पारीखला दिले होते पंतप्रधानांच्या खोट्या सहीचे ओळखपत्र

- Advertisement -

मुंबईतील वांद्रे-कुर्ला संकुलातील जिओ वर्ल्ड प्लाझामध्ये कथित संशयास्पद पंतप्रधान कार्यालयाचे ओळखपत्र दाखवून प्रवेश करण्याचा प्रयत्न केल्याप्रकरणी अटक करण्यात आलेला रोहन पारेख याच्याबाबत धक्कादायक माहिती समोर आली आहे. त्याला पंतप्रधानांच्या कार्यक्रमस्थळी कुणीतरी नियुक्त केले होते आणि त्यासाठी आवश्यक ते ओळखपत्र तयार करून देण्यात आले होते. अर्थात ते बनावट होते. यासंदर्भात पारेखच्या वकिलांनी मंगळवारी न्यायालयात सांगितले की, पारेखला आपण पंतप्रधान कार्यालयाशी संबंधित कामासाठी नियुक्त झालो आहोत, असे सांगण्यात आले असावे आणि तो स्वतःच फसवणुकीचा बळी ठरला असावा.

मुंबई पोलिसांनी पारेखला अटक केल्यानंतर न्यायालयाने त्याला ११ सप्टेंबरपर्यंत पोलीस कोठडी सुनावली आहे. या प्रकरणात आणखी एका व्यक्तीचा शोध सुरू आहे.

हे प्रकरण सोमवारी जिओ वर्ल्ड प्लाझाच्या प्रवेशद्वारावर पारेखसोबत असलेल्या त्याच्या कथित अंगरक्षकाला अडवण्यात आल्यानंतर समोर आले. दिलीप कुंडे नावाच्या या व्यक्तीकडे पिस्तुल आढळल्याने सुरक्षा कर्मचाऱ्यांनी त्याची चौकशी केली. त्यानंतर पारेखच्या ओळखीबाबतही संशय निर्माण झाला.

मुंबई पोलिसांच्या माहितीनुसार, ही घटना पंतप्रधान नरेंद्र मोदी यांच्या मुंबईतील नियोजित कार्यक्रमाच्या एक दिवस आधी, सोमवारी घडली. पोलिसांच्या म्हणण्यानुसार, कार्यक्रमाच्या तयारीचे काम सुरू असताना पारेख जिओ वर्ल्ड प्लाझामध्ये दाखल झाला होता. त्यानंतर त्याच्यासोबत असलेला कुंडे पिस्तुल घेऊन प्रवेशद्वारावर आला. प्रवेशावेळी धातू शोधक यंत्राद्वारे तपासणी केली असता त्याच्याकडील पिस्तुल आढळले.

सुरक्षारक्षकांनी कुंडेला रोखल्यानंतर त्याने पारेखशी संपर्क साधला. तेव्हा पारेख पुन्हा प्रवेशद्वारावर आला आणि त्याने सुरक्षा कर्मचाऱ्यांना ओळखपत्र दाखवले. या ओळखपत्रावर पारेखला पंतप्रधान कार्यालयातील ‘ग्रेड सी’ अधिकारी असल्याचे नमूद करण्यात आले होते. मात्र, ओळखपत्रावरील काही बाबींमुळे सुरक्षा यंत्रणेला संशय आला. ओळखपत्रावर जारी केल्याची तारीख होती; मात्र वैधतेची अंतिम तारीख नमूद करण्यात आलेली नव्हती. सरकारी ओळखपत्रांवर सामान्यतः वैधता कालावधी नमूद केला जातो. तसेच ओळखपत्रावर जारी करणाऱ्या व्यक्तीची स्वाक्षरी होती; मात्र त्या व्यक्तीचे पद नमूद केलेले नव्हते.

हे ही वाचा:

तेलंगणात बीआरएसच्या दोन आमदारांना अटक

लडाखच्या २० अजिंक्य शिखरांवर तिरंगा

उत्तर प्रदेशसाठी भाजपचा नवा फॉर्म्युला

हल्द्वानीतील ‘शुद्धीकरण’ प्रकरणात अखेर एफआयआर

न्यायालयातील सुनावणीदरम्यान पारेखच्या वकिलांनी महत्त्वाचा दावा केला. पारेखला पंतप्रधान कार्यालयाशी संबंधित नोकरीची संधी मिळाल्याचे खरोखर वाटत होते आणि त्यामुळे त्याचीच फसवणूक झाली असण्याची शक्यता आहे, असे त्यांनी सांगितले. तरुण कपूर नावाच्या व्यक्तीने पारेखला पंतप्रधान कार्यालयात काम करण्याची संधी देऊ केली होती, असा दावा बचाव पक्षाने केला. तसेच महक गुप्ता यांच्याशी संबंधित सल्लागार पदाचीही त्याला ऑफर देण्यात आल्याचे वकिलांनी सांगितले.

‘संरक्षण खरेदी धोरणा’संदर्भातील ई-मेलही तरुण गुप्ता नावाच्या व्यक्तीकडून मिळाल्याचा दावा करण्यात आला. बचाव पक्षाच्या म्हणण्यानुसार, पारेखला नियुक्तीपत्र, ओळखपत्र आणि पंतप्रधान नरेंद्र मोदी यांच्या स्वाक्षरीचे असल्याचे भासवणारे एक पत्र मिळाले होते. याशिवाय पंतप्रधानांच्या कार्यालयातील अतिरिक्त सचिवांकडून आल्याचे भासणारा ई-मेलही त्याला मिळाला होता.

ही सर्व कागदपत्रे आणि संदेश अधिकृत असल्याचे पारेखला वाटत होते. त्यामुळे आपण कायदेशीररित्या पंतप्रधान कार्यालयाशी संबंधित असल्याचा त्याचा विश्वास बसला, असा युक्तिवाद त्याच्या वकिलांनी केला. पारेखने त्याच्याकडे असलेली सर्व कागदपत्रे आणि संदेश तपास अधिकाऱ्यांकडे सुपूर्द केले आहेत. तसेच या प्रकरणातील संबंधित व्यक्तींचे संपर्क क्रमांकही पंतप्रधान कार्यालयाकडे पडताळणीसाठी देण्यात आल्याचे बचाव पक्षाने सांगितले.

सोबत अंगरक्षक ठेवण्याचे मिळाले होते निर्देश

पंतप्रधान कार्यालयात नियुक्त केल्याचा दावा करणाऱ्या रोहन पारीखचा बचाव करणाऱ्या वकिलांनी महत्त्वाचा दावा केला आहे. पारेखला कथित पंतप्रधान कार्यालयाच्या ओळखपत्राची प्रत्यक्ष छापील प्रत कधीच मिळाली नव्हती. त्याऐवजी हे ओळखपत्र केवळ छायाचित्राच्या स्वरूपात किंवा प्रतिमेच्या रूपात त्याला पाठवण्यात आले होते आणि त्याच आधारावर तो ते वापरत होता, असे वकिलांनी सांगितले.

पारेखला मिळालेली नियुक्तीची कागदपत्रे, पंतप्रधानांच्या स्वाक्षरीचे कथित पत्र आणि अतिरिक्त सचिवांच्या नावाने आलेले ई-मेल यामुळे तो दिशाभूल झाला असण्याची शक्यता असल्याचे बचाव पक्षाचे म्हणणे आहे. पारेखकडे २०२४ पासून वैयक्तिक अंगरक्षक असल्याचा दावाही त्याच्या वकिलांनी केला. त्या वर्षी डिसेंबरपासून त्याला अंगरक्षक नियुक्त करण्याचे निर्देश देण्यात आले होते, असेही सांगण्यात आले.

गणित आणि विज्ञान विषयात पदवी घेतलेल्या पारेखने त्याला मिळणाऱ्या संदेशांवर विश्वास ठेवून त्यानुसार कृती केली, असा दावा बचाव पक्षाने केला. सरकारी अधिकारी असल्याचे भासवण्याचा पारेखचा जाणीवपूर्वक कोणताही हेतू नव्हता. पंतप्रधान कार्यालयाशी आपला संबंध असल्याचे सांगून कोणीतरी त्याची दिशाभूल केली आणि त्याने त्या सूचनांनुसार कृती केली असावी, असा युक्तिवाद त्याच्या वकिलांनी केला.

जिओ वर्ल्ड प्लाझामध्ये पारेख नेमका का गेला होता, याचेही स्पष्टीकरण बचाव पक्षाने दिले. पारेखला पाठदुखीचा त्रास असल्याचे सांगत त्याच्या वकिलांनी तो पंतप्रधानांच्या नियोजित दौऱ्याच्या एक दिवस आधी वैयक्तिक कामासाठी तेथे गेला होता, असे सांगितले. आपल्या भावी पत्नीसाठी अत्तर खरेदी करण्याकरिता तो तेथे गेला होता. त्यानंतर तो परिसरातून निघून गेला आणि चौकशीसाठी बोलावल्यानंतर त्याने अधिकाऱ्यांना सहकार्य केले, असा दावा बचाव पक्षाने केला. दरम्यान, दिलीप कुंडेकडे सापडलेले पिस्तुल परवानाधारक असल्याचे पोलिसांनी स्पष्ट केले आहे.

या प्रकरणात आतापर्यंत दोन जणांना अटक करण्यात आली असून आणखी एका व्यक्तीचा शोध सुरू आहे. संशयास्पद सरकारी ओळखपत्र कोठून मिळाले, ते कशासाठी वापरण्यात आले, आरोपींची भूमिका काय होती आणि पिस्तुलासह परिसरात प्रवेश करण्यामागील नेमका उद्देश काय होता, याचा गुन्हे शाखेकडून तपास सुरू आहे.